(Dili) Mudansa – Nuuda foin-sa’e tenke Evita dependénsia ba inan aman no família sira liu husi hanoin inovativu hodi halo negósiu ki’ik ruma nune’e bele hakmaan inan aman sira nia esforsu ba oan sira.
Hanesan mós Joven feto ida ho naran Roeda Manduly Loly ho (25) ne’ebé mai ho hanoin kreativu no inspirativu tebes hodi kria rasik kampu servisu ba nia an hodi selu rasik nia estudu tanba ho prinsípiu ida atu depende ba inan aman tan ne’e nu’udar joven tenke aprende barak halo buat ruma.
Roeda Manduly Loly nu’udar na’in ba Boba Rohani iha ne’ebé, antes ne’e Loly hamutuk ho ninia belun na’in rua tau hanoin hamutuk oinsá bele halo buat ruma hodi hetan osan liu husi kria kampu servisu halo negósiu Boba nune’e hakmaan inan aman nia todan no Evita dependénsia ba ema seluk.
Loly konta, iha momentu Pandemia COVID-19 atividade hotu paradu nia ho kolega sira tau ideia hamutuk oinsá halo bisnis ki’ik oan ida bele hetan osan maski la barak maibé bele responde ona ba ninia nesesidade loroloron inklui selu nia estudu tanba Loly hala’o ninia estudu iha Institutu Siensia Saude (ICS) Departamentu Enfermajen.
“liu husi bisnis ki’ikoan ne’e bele hakmaan inan aman nia todan ne’ebé iha tanba ha’u nafatin esforsu an hodi ajuda inan-aman liu husi negósiu Boba nune’e inan aman mós bele kontente nune’e mós ita labele dependénsia beibeik ba sira,” dehan Roeda ba jornalista média mudansa iha Kampu Alor tersa, 14/11/2023
Nia haktuir, iha 2021 inisiativa husi joven na’in 3 ne’ebé mai ho nia hanoin inovativu hodi tau ideia hamutuk to’o ikus konsege loke Boba ne’ebé ho naran Boba Rohani no hahú ho osan montante $ 150, hodi sosa ekipamentus.
“Agora hela de’it ami na’in rua ha’u-nia kolega ida lolos ami na’in tolu maibé kolega ida maka sai tiha ona, Ami nia halo negósiu Boba ne’e to’o ona tinan 2 no osan ne’ebé ami hetan uza hodi selu ba ami nia estudu no suporta nesesidade família nian inklui ami nia nesesidade loroloron,”konta nia
Nia relata, Kona ba rendimentu depende ba ema sosa tanba agora ema fa’an bobak iha fatin barak ona entaun kada loron ami hetan $.40. 00, iha ne’ebé, Boba Rohani rasa oioin hanesan rasa taro, Fanila, stroberi ,capecinho no rasa chocolate.
Loly deklara, Tuir planu ne’ebé sira iha hakarak loke tan fatin boot liu ida ne’e maski eskola ba saúde maibé Loly hakarak kontinua halo negósiu Boba.
“Bisnis ki’ik oan ida ne’e ho grasa maromak nia loron ida ha’u hetan servisu mós ha’u lakohi husik maibé kontinua loke nafatin tanba liu husi ida ne’e mak konsege remata ami nia estudu iha ICS,” katak nia
Nune’e mós Loly hato’o rekomendasaun ba joven sira ne’ebé remata ona estudu iha Universidade no balu hala’o hela estudu labele moe hodi halo atividade ne’ebé fó benefísiu ba ita-nia moris bainhira hasoru dezafius barak labele rende maibé nafatin pasiénsia hodi to’o susesu.
Jornalista : Domingas Viana
Editór : Orlando Magno
