(Dili) Mudansa – Difisiensia matan ho naran Lúcia Monteiru Guterres tinan (20) iha inisiativa rasik halo es buah hodi fa’an maske nia simu liafuan oioin husi ema seluk maibe Lucia nafatin hatudu oin midar ho pasiensia kontinua hala’o negosiu.
“Iha negosiu ki’ik ne’e dezafius barak mak hau hasoru, primeira vez foin fa’an ema koalia hau ,maibe ho pasiensia kontinua fa’an produtu neebe hau iha maske sira koalia oioin mai hau,” Lucia konta ba jornalista media mudansa iha kampung Baru Dili, Sabado 22/04/2023.
Feto Bonita nee haktuir, maske nia rona liafuan barak husi ema seluk maibe la hamate nia vontade atu fa’an tanba liafuan hirak ne’ebe ema koalia hanesan motivasaun id aba Lucia oinsa atu sai forsa liu hodi kontinua hala’o nia negosiu Es Buah ne’ebe produs husi Ai-dila no hudi tasak inklui susu been.
“Dalaruma sira dehan ha’u kondiasaun hanesan ne’e depois fa’an tan ladiak ida, iha ami nia bairu laran mos koalia hotu ha’u maibe ha’u nafatin lori ispiritu pasiensia ho hamnasa hasoru sira dala ruma ha’u nia pasiensia ne’e sei lori ha’u ba dalan sucesu maske sira koalia ha’u hanesan ne’e,” Nia akresenta.
Lucia konta, negosiu ki’ik ida ne’e inisiativa mai husi nia an rasik foun foun halo es buah tanba aprende husi média social ou youtube hafoin mak nia halo tuir hodi fa’an fila fali.
“Primeiru ha’u nonton iha youtube depois ha’u halo tuir fali saida mak ha’u haree iha youtube halo primeiru ne’e hau fo ba hau nia familia sira koko uluk tiha maibe sira dehan diak entaun iha ne’e kedas motiva ona hau atu halo ona es buah ne’e,” nia esklarese.
Lucia akresenta, halo esbuah fa’an loroloron iha uma susar ba nia atu hetan osan hodi sosa ninia prezisa no familia sira nia precisa tanba nee Lucia deside halo es buah fa’an iha fatin ne’e to’o ona fulan ha’at.
Nia realsa, iha faze primeiru Lucia nia mama fo osan ba nia hamutuk dolar 20 atu halo es buah tuir buat neebe Lucia haree ona iha Youtube, hafoin remata iha priodusaun Lucia bai ha Es Buah iha Dili laran no osan neebe nia hetan husi ninia negosiu nee uza fali ba nesesidade uma laran no balu fo nia mama rai.
“Kada es buah ne’ebe mak ha’u fa’an ne’e nia presu kopu ida nia folin 0,25 no kopu bo’ot ne’e nia folin 0,50 centavus dalaruma loron ida ema sosa to’o dolar 10 no planu ba oin ha’u hakarak halo fali bisnis ne’e sai bo’ot liu tan iha futuru mai,” Lucia afirma.
Difisiensia Lúcia Monteiru remata nia estudu sekundariu iha CANOSA, hakarak atu kontinua estudu maibe finanseiru la sufisiente tamba tanba Lucia nia mae mesak tau matan ba sira nain 6 ho ida ne’e nia senti ladiak entaun la kontinua nia estudu.
Jornalista : Domingas Viana
Editór : Orlando Magno
