(Dili) Mudansa – Nu’udar joven ne’ebé riin no abut ba nasaun nia labele hanoin atu depende beibeik ba inan aman maibé tenke esforsu an iha área oioin nune’e bele hamosu ideia kreativu hodi loke rasik kampu servisu hodi selu eskola, nune’e labele husu no ezije beibeik ba inan aman atu fo osan.
Tanba ne’e iha tempu ida agora joven balu esforsu sira an ho ideia ne’ebé kreativu hodi kria rasik kampu servisu oinsá atu ajuda no hakmaan inan aman nia terus ba oan sira nia futuru maibé situasaun agora maioria joven barak mak sei nafatin tabele an ba inan aman.
Vascolino Germano Freitas hanesan foin-sa’e kreativu ne’ebé lakohi hare de’it ba inan aman maibé nia esforsu an hodi kria kampu servisu loke Rental hodi selu rasik eskola no uma aluga (koos) tanba Vascolino iha feton maun-alin hamutuk na’in hitu no Vascolino oan ba dahaat iha uma laran.
“Hanesan joven ida ha’u iha mehi rasik katak ha’u mai husi família ne’ebé simples no hanesan mós ema agrikultór iha hanoin ida katak ha’u tenke hamriik mesak hodi halo netik buat ruma hanesan loke rentál atu ita selu rasik eskola no koos la’os dependénsia de’it ba inan aman,” dehan Vascolino ba média Mudansa Kaikolia Dili, 16/03/2023.
Vascolino harii rasik rentál, bainhira nia akaba ensinu sekundáriu iha 2017 depois mai Dili atu kontinua estudu iha universidade, maibé nu’udar ema ne’ebé hela iha kós lakohi depende liu ba inan aman.
Nia haktuir, momentu ne’ebá, nia tuir de’it ema emprezáriu balun ne’ebé loke rentál iha Timor hodi servisu hamutuk ho empreza na’in, no loron ida Vascolino hetan de’it persentajen maibé depende ba kliente sira.
“Ami mós aprende ona buat balun husi ne’ebá entaun ami na’in haat tau ideia hamutuk hodi foti desizaun harii rasik kampu servisu hanesan loke rentál, ho fundus hamutuk $.100 ami mós koko atu halo kréditu iha fatin balun maibé la la konsege entaun kontinua de’it ho $.100 ne’ebé ami iha” nia esplika.
Foin-sa’e kreativu ne’e akresenta, molok servisu ho emprezáriu ne’e nia iha nanis ona atividades seluk hanesan fa’an ákua maibé nia sente ida ne’e ladún sufisiente atu selu ninia eskola no uma ne’ebé nia hela.
Nia hatutan, atividade ne’ebé sira halo iha rentál mak hanesan ukir marmer, sablon kaus, Print no kopia dokumentu no mós atividade seluk tan, kona-ba rendimentu loron ida bele hetan to $.200 no tun liu mak $.100 maibé hirak ne’e hotu sempre liu husi difikuldade oioin.
“Difikuldade durante ne’e ami hasoru maka’as liu iha tinta sablon kaus nian tanba tinta ne’ebé ami uza Importa husi indonézia dala ruma to’o mai tarde maibé kliente sira ezije tenke lalais entaun ida ne’e mak sai problema boot mai ami,”.
Ikun liu Vascolino rekomenda ba joven sira oan labele depende de’it ba inan aman no labele moe atu halo buat ruma, maibé tenke hamriik independente hodi kontribui ba nasaun ida ne’e, tanba dala barak joven hein kampu servisu husi governu ne’e susar maibé nu’udar joven tenke hamriik metin kria rasik kampu servisu maski rezultadu natoon importante halo buat di’ak.
Estajiada : Isabel de Fatima
Editór : Orllando Magno
