(Dili) Mudansa – Membru Parlamentu Nasionál (PN) Alexandrino Cardoso deskonfia kompara balun manipula presu telefone Iphone ho folin ne’ebé boot tebe-tebes tanba hatama iha fronteira ne’e selu taxa natoon hela maibé mai to’o iha rai laran, fa’an fali ho folin ne’ebé karun.
“Ezemplu telefone Iphone ida, sira selu taxa ne’e mínimu tebetebes, tanba la hetan kontrolu másimu husi ita-nia funsionáriu Alfandega sira, entaun husik liu de’it, maibé to’o iha ita-nia rai laran fa’an ho folin ida ne’ebé karun tebetebes,”dehan Deputadu Alexandrino iha plenária PN, tersa 24/1/2023.
Deputadu Alexandrino konsidera, atitude ida-ne’e nu’udar problema ida ba Timor-Leste, tanba ne’e husu governu presiza rekruta tan funsionáriu Alfandega sira hodi bele kontrola sasán sira ne’ebé tama husi fronteira terestre ne’e ho di’ak.
Tuir nia katak, dadaun númeru funsionáriu Alfandega ne’ebé kontrola sasán tama husi fronteira terestre mínimu, bainhira karreta boot sira tama mai rua ou tolu, cek lista de’it no sasán barak mak sira labele atu kontrolu inklui sasán sira ne’ebé selu taxa ho valór mínimu maibé mai to’o iha rai laran fa’an ho presu ida ne’ebé karun tebetebes.
Jornalista : Ekipa Média Mudansa
Editór : Orlando Magno
