Benefisius Utiliza Android, Joven Na’in 2 Kria Rasik Kampu Servisu

banner 120x600

(Dili) Mudansa – Uza telefone android la bele gasta tempu ba buat ne’ebé la folin iha futuru maibé uza android hodi aproveita kreatividade (tutorial) iha media sosial nune’e bele kria rasik kampu servisu ba ida-idak nia an atu la bele dependénsia beibeik ba governu no estadu mak atu fó servisu.

Bainhira gasta tempu ba buat ne’ebé labale mak sei arrepende iha loron aban bainhira haree ema seluk susesu tanba ne’e presiza esforsu an hahú agora nune’e bele moris kontente iha futuru.

Se hatene Utiliza Telefone android mak sei mosu Rezultadu pozitivu ba moris hanesan mós joven na’in Gelnoris da Silva no Ajor Domingos Amaral harii rasik grupu kreativu ho naran Silgom wood carving & (Ai-Talik Timor Kreativu) tanba fiar metin ba esperiénsia kreatividade ne’ebé sira aprende husi youtube.

Joven na’in-rua kria Grupu kreativu ne’e ho objetivu atu prodús sasán ne’ebé aat no la uza ona hanesan Ai rohan, vidru rohan hodi halo sai fali ukir ne’ebé ho nia modelu oioin.

Manejer Silgom wood carving & (Ai-Talik Timor Kreativu) Gelnoris da Silva informa, halimar telefone de’it la aproveita buat ruma bele impaktu ba ita-nia moris tanba lakon pulsa saugati de’it, maibé bainhira uza telefone aproveita ema seluk nia kreatividade iha Facebook, Instagram, youtube no tiktok, hodi hetan buat ruma.

Sira nain tolu hatudu hela produtu neebe sira produs ona,  Gelnoris mak uza kamiza kor metan Ajor mak hamrik iha klaran no ida seluk volutariu. Imajen MD

“Ideia ami-nia ne’e mosu iha Covid-19, 2021, momentu ne’ebá ami tuur la halo buat barak, maibé ami buka ideia ruma oinsá bele prienxe fali ami-nia tempu, entaun ha’u ho kolega ida, tur deskute tun sa’e, hodi nonton Youtube, haree ema nia kreatividade mosu hanoin ida katak, ami mós bele halo,” dehan Gelnoris da Silva ba média mudansa iha Bebonuk, sábadu 27/1/2023.

Gelnoris afirma, Iha tempu ne’ebá sira la iha osan ne’ebé ho montante boot, maibé sira hahú uluk tuir kbiit ne’ebé sira iha entaun hola mákina produsaun ida, depois prodús uluk tukir ki’ik, maibé sira nafatin ho hanoin ne’ebé luan oinsá atu aumenta tan produtu ho modelu seluk.

“Ami komesa hili de’it vidru bekas sira husi Aimutin ne’ebá, lori mai, depois ami koko ukir to’o dala neen ou dala hitu, maski sala hela de’it maibé ami kontinua halo beibeik, tanba haree hanesan buat foun entaun ami koko halo nafatin, to’o ikus ida mak jadi duni,” Gelnoris relata.

Nia haktuir, husi atividade ne’e Gelnoris ho nia kolega kontinua sira nia atividade ukir ai no vidru atu hatudu produtu di’ak liután iha kliente sira nia matan, tanba uza prodús uza mákina lalais liu duke la uza mákina.

“Iha ne’e ami halo, Ukir tara xave (gantunggan) ho ukir ai kabuar, ukir vidru, dala ruma ami-nia kliente sira hameno rasik, tanba ami halo ida ne’e bazeia ba kliente nia hakarak maibé ami halo tuir ami nia kapasidade Ida tan mak, kelebihan husi ami-nia atu hamenus mós lixu ami rekolla filafali lixu mak transforma fali ba sasán uza nian,” Gelnoris esplika.

Joven kreativu ne’e argumenta, iha tinan kotuk 2022 sira tuir kompetisaun ida no hetan apoiu husi MTCI, mak sosa fali mákina lubuk bo’ot ida ne’ebe hanesan mákina Band Saw, Scroll Saw, Planer, Jointer, no mos Mákina Laser.

Nia konta, atividade ne’ebé sira iha sempre halo iha tempu kalan husi jam 5 to’o 10 ou dala ruma tuku 12, depende ba kliente sira hameno tanba kada prodús ukir Ai, dala ruma la to’o loron tomak, maibé ukir vidru mak uza manuál de’it, kuandu ukir, folin mak bainhira Ukir-ai $.5.00, ukir vidru $.10.00, ukir vidru boot  $.15.00 no mós ida uza lampu mak $25.00.

“agora ema manda sira nia imajen mai ma mak ami foin ukir tuir kliente nia hakarak ezemplu manda imajen jesus nia ami halo tuir de’it ida-ne’e, la’os dehan ita halo tiha mak lori ba fa’an ne’e laiha, se sira hakarak ukir vidru liga ho ahi mós bele hotu, maibé presu la hanesan, karik sira lakohi liga lampu ami tau presu normál,” nia akresenta.

Nia salienta, mákina ki’ik ho boot dadaun ne’e hamutuk 20 resin, ne’ebé atu prodús ba sasán ukir ninian sira sente kompletu hotu ona, no sufisiente ba sira atu hala’o sira nia atividade ne’ebé nakonu ho hanoin kreativu.

“Primeiru ami na’in rua kolega de’it, depois mai mak aumenta tan kolega balun maibé sira la’os permanente, tanba sira mai aprende de’it loron ida sira mai halo sira-nian hotu fila, di’ak ida sira mai la halo buat ida fila fali maibé ami na’in-rua kolega permanente,,” nia deklara.

Iha fatin hanesan, fundadór “Silgom wood carving & (Ai-Talik Timor Kreativu)” Ajor Domingos Amaral, hanesan funsionáriu voluntáriu iha Fundasaun Mahein deklara, Sim, ideia ida-ne’e inisiál mai husi sira na’in rua Gelnoris, tanba ne’e Ajor lakohi ko’alia barak maibé hakarak hato’o de’it ninia mensajen ba joven sira karik tama internét, palu menus vizita sira ne’ebé mak tau vídeo kreativu ne’e,

“Nonton kreativu sira ne’e, hodi nune’e motiva ita nune’e ita mós bele halo iha ita-nia vida sosiál hodi kontribui reseita uma laran no mós bele sustenta ita-nia moris loroloron ninian,” nia hakotu.

Jornalista : Ekipa Media Mudansa

Editór        : Orlando Magno

banner 325x300