(Media mudansa)– Komemorasaun Loron Restaurasaun independensia Repúblika Demokrátika Timor-Leste (Sigla-RDTL) ba dala rua nulu resin-tolu (23) iha Munsipiu Bobonaru Posto Administrativu Cailaco mosu konfrontu entre Joven sira husi Grupu balun nebe rezulta joven mane ida hetan tiru husi Polísia Nasionál Timor-Leste (sigla-PNTL), ikus mai hamosu joven ida ho idade rua nulu resin tolu (23) naran Ronaldinho da Costa Ximenes lakon vida iha fatin akontesimentu mais ou menus iha tuku 13:00 oras Timor-Leste.
Tuir informasaun ne’ebé Media Mudansa asesu liu hosi fontes kredivel balun hato’o katak Los duni akontese desintendimentu iha postu Cailaco, munisipiu Bobonaru. Hafoin tuda malu no duni malu entre Grupu rua, halo komunidade sira halai namkari tanba pániku iha kampu icar bandeira RDTL ninian.
Durante desintendimentu, parte PNTL halo ne’ebé presente iha fatin akontesimentu halo kedas intervensaun ba kazu refere no tiru kanek joven mane ida no kanek iha hirus-matan rezulta ran sai makaas.
Hafoin iha akontesimentu ne’e, joven nebe ho naran Ronaldinho da Costa Ximenes sofre kanek iha hirus-matan parte liman-los , hetan apoia no tula husi PNTL sira ba kedas sentru saúde Cailaco maibe kondisaun Grave ka todan, hafoin iha prosesu transporta ba Munisípiu Bobonaru hodi halo tratamentu intensivu maibe minutu ikus la konsege salva joven refere nia vida tanba kondisaun grave.
Enkuantu ho presenza no atuasaun PNTL Cailaco, situasaun la’o normal hikas, komunidade sira kontinua mantein hodi hein ba partisipa hatun bandeira RDTL iha Cailaco, munisípiu Bobonaru.
Matebain Ronaldinho da Costa Ximenes moris iha Suku Miligo, postu administrativu Cailaco iha loron 13 fulan Maiu tinan 2002 no hakotu iis iha loron 20 fulan Maiu 2025 ho idade ruanulu resin tolu (23) tanba hetan tiru hosi Membru PNTL iha hirus-matan.
Entretantu tuir observasaun mate isin husi joven nebe hetan tiru husi PNTL oras nee dadaun to’o ona iha
Sala Mortuario Hospital Nasional Guido Valadares Dili (sigla-HNGV) Hodi Kontinua Submete ba Prosesu Autopsia.
Enkuantu to’o informasaun ne’e publika, husi parte Polisia liu-liu komando PNTL Munisipiu Bobonaro seidauk aprezenta nia pozisaun ruma ba kazu refere.(Nafatin akompaña notisia tuir mai).
Ekipa Kobertura
