(Díli) Institute Of Business (IOB)- realiza orientasaun akadémiku tinan 2025 ba kandidatus estudante foun hamutuk na’in atus ualu (800) kompostu husi fakuldade 4 ne’ebé mak eziste iha Universidade Institute Of Business (IOB) ho tema orinetasaun Responsabilidade Institusional ba Kualidade Peskiza no Impaktu Dezenvolvimentu Rekursu Umanu.
Tuir reitor (IOB) Pedro Bareto Ximenes, hatete, halo abertura ba atividade orientasaun iha kampus (IOB) C, Fomentu II, kuaze loron tolu (3) no sei remata iha loron 12 Kuarta, no estudante foun ne’ebé mak rejistu iha universidade ne’e hamutuk nain atus sia (900) husi númeru ne’e sira nain atus ida (100) mak la tuir orientasaun.
“Objetivu prinsipal ba atividade orientasaun ne’e atu halo koñesementu ba sistema akadémiku no koñesimentu ba dosente aprendizajen nian no mós atu introdus ba estudante foun sira ba ambiente foun iha (IOB) nian ho nune’e atividade ne’ebé sira halo iha loron tolu ne’e barak liu mak sei halo palestra no halo atividade sira atu halo konsulta husi parte fakuldade sira nune’e sira bele hatene saida mak sira nia kna’ar hanesan estudante no saida mak sira presiza atu halo, no mós sira bele hetan koñesimentu foun iha loron tolu nia laran, dehan reitor (IOB) Pedro Bareto Ximenes, ba jornalista sira iha Kampus IOB, Segunda, 10/03/2025
Reitor ne’e dehan, kompara iha tinan kotuk la hanesan ho tinan ida ne’e, iha tinan ida ne’e barak liu tinan kotuk, tinan ida ne’e totál kandidatus estudante foun hamutuk 900, no mós iha tinan kotuk kandidatus estudante foun hamutuk na’in 800 ne’ebé mak tuir Orientasaun nian hamutuk 650, no mós kontinua atividade desde tinan rua no tolu liu ba kotuk, sira muda ona atividade orientasaun la’os atividade ne’ebé mak hanesan violénsia, sira muda atividade ida ne’e hanesan estudante sira bele iha koñesementu no sira bele iha transzisaun di’ak.
“Prosesu ba aprendizajen ba anu letivu foun, ba sira ne’ebé mak iha semester 3, 5 no 7 ne’e sira agora hahú sira nia aprendizajen iha fulan kotuk, ba sira ne’ebé mak foin tuir orientasaun ba tinan akadémiku ida ne’e sira mós semana oin hahú ona prosesu aprendizajen, iha universidade (IOB) iha fakuldade 4 mak hanesan; ICT, Ekonomia Negosiu, Enjenaria, no Hospitalidade Turízmu, no mós iha programa iha Pos Graduasaun ba mestradu nian”, dehan reitor IOB
Reitor ne’e husu ba estudante foun sira atu uza loron tolu (3) ne’e hanesan oportunidade atu aprende no prepara didiak sira nia an antes tama ba iha ambiente eskola nian hodi muda sira nia mentalidade no muda sira nia future ho prespetiva pozitiva ba susesu iha sira nia area.
Iha fatin hanesan reprezentante husi kandidatus estudante foun, Elio Espiritu Santo da Costa Ximenes, hatete nia sente hanesan previlejiu bo’ot tebes sai hanesan estudante kandidatus ba instituisaun (IOB) nian iha tinan akademiku 2025 ne’e.
“Bukae sira ne’ebé aprende iha orientasaun loron tolu nian husi parte ne’ebé mai ho tema diferente, maibé ho intensaun ida ne’ebé hakarak atu promove estudante sira ba iha dalan ne’ebé lo’os katak buat hirak ne’ebé nia hanoin katak durante sira aprende, sira estudante atu aplika fila fali, no iha primeiru ba sira rasik oinsá atu promove sira nia an rasik, no di’ak liu tan iha prioridade hatudu síviku, no kontribui ba sosiedade sira hafoin ba ami nia an rasik no ha’u hanoin katak fasilmente tebes ba ami atu fasilita ba ema ne’ebé mak iha ami nia ambiente iha Kampus ida ne’e”, dehan kandidatu estudante Elio Espiritu Santo da Costa Ximenes.
Entretantu kandidatus estudantes ne’ebé mak rejistu iha Universidade Institute Of Business (IOB) hamutuk nain atus sia (900), maibé husi númeru ne’e iha kandidatus nain atus ualu (800) mak tuir orientasaun durante loron tolu (3) hahú husi Segunda,10/03/2025 to’o iha loron Kuarta 12/03/2025
Estajiadu: Rogerio Anuno/Nelino dos Reis
Editora: Sandi Belo
