(Díli), Jardim 5 de Maiu 01/06/2026 – Komunikadu Impresa ne’e organiza husi Movimentu Foin sae Atsabe (MOFA), komunikadu Impresa ne’e sira esplika kona-ba Kondisaun estrada ne’ebé liga Gleno ho Atsabe iha Munisípiu Ermera atualmente sai preokupasaun bo’ot ba komunidade sira tanba estrada ne’e aat no difísil atu pasa, liu-liu iha tempu udan, situasaun ida-ne’e la’ós de’it afeta movimentasaun transporte no viajen povu nian, maibé mós influénsia diretamente atividade hanesan ekonómika no difisil ba sira atu asesu ba edukasaun, saúde no mós nesesidade bázika sira iha sira nia moris loron-loron hala’o, no povu sira ne’ebé depende de’it ba transporte públiku no atividade agrikultura kontinua enfrenta difikuldade bo’ot tanba transporte la halo movimentasaun ho di’ak mós folin gajolina sa’e maka’as.
Movimentu Foinsa’e Atsabe (MOFA), liu hosi komunikadu imprensa ida ne’ebé lansa ona, hato’o katak kondisaun estrada ne’e agora sai obstákulu bo’ot ba movimentasaun komunidade sira. Sira afirma katak povu hasoru difikuldade atu asesu servisu básiku sira, inklui edukasaun no saúde, tanba kondisaun estrada ne’ebé aat no difísil atu pasa.
Porta-voz (MOFA), Agostino Gomes Fernandes, hatete katak Ermera nu’udar área produtór kafé importante iha Timor-Leste, maibé infraestrutura ne’ebé la di’ak kontinua halo komunidade sira hasoru difikuldade boot. Kondisaun dalan ne’ebé aat afeta la’ós de’it transporte, maibé mos impede eskuema distribuisaun produtu agríkola no atraza kresimentu ekonómiku iha área refere.
“Estrada ne’e la’ós de’it problema transporte de’it, maibé mós iha impaktu bo’ot ba ekonomia no moris povu nian iha tempu naruk, kondisaun dalan ne’ebé aat ne’e halo komunidade sira difisil atu asesu servisu públiku, merkadu, edukasaun no saúde, situasaun ida-ne’e hamosu atrasu no hametin tan difikuldade moris loron-loron nian,” dehan Agostino Gomes Fernandes foin lalais ne’e .
Nia esplika katak antes, viajen hosi Díli ba Atsabe bele remata iha oras 5 to’o 6, maibé agora aumenta sai oras 12 to’o 14 tanba estrada aat no difícil atu pasa. Kustu transporte mos sa’e maka’as hosi $5 ba $17 ba pasajeru ida.
Iha parte seluk, membru (MOFA) Mau Dasi hatete katak komunidade iha area rural sira mak sente diretamente impaktu husi situasaun estrada ne’ebé aat.
Nia esplika katak estudante sira, agrikultór no família sira ne’ebé depende ba transporte públiku agora hasoru difikuldade bo’ot atu asesu servisu esensial hanesan edukasaun, saúde no atividade ekonómika loron-loron nian. Kondisaun ida-ne’e mós halo movimentasaun sai limitadu tebes.
“Iha área, balu família sira la iha opsaun seluk no obriga atu la’o ain hosi Atsabe ba Gleno tanba kareta la bele liu liu husi estrada ne’ebé aat, situasaun ida-ne’e hamosu difikuldade bo’ot ba komunidade sira, liu-liu bainhira sira tenke lori sasán ka ba buka atendimentu esensial hanesan saúde no merkadu,” nia dehan.
Nia mós hatete katak kondisaun estrada ne’ebé aat halo transporte sira la bele to’o lais,iha merkadu Situasaun ida-ne’e fo impaktu direta ba distribuisaun produtu agríkola sira, tanba produtu sira la bele to’o lalais, tanba ne’e mak, agrikultór sira hasoru difikuldade bo’ot tebes ba sira atu fa’an produtu ho folin ne’ebé di’ak.
Tanba ne’e, MOFA husu ba Governu Sentrál, Ministériu Obras Públikas no autoridade relevante sira atu halo intervensaun lalais hodi hadi’a no konstrui fila-fali estrada Ermera–Atsabe.
Organizasaun ne’e mos konvida juventude, estudante no komunidade sira atu hametin solidariedade no hamutuk defende direitu povu nian ba infraestrutura di’ak no moris dignu.
Jornalista/Estajiada : Caryn Camões
Editor : Ana Maria da Silva
