(Dili), Aitarak laran 26/05/2026 – Prezidente Repúblika Demokratika Timor-Leste (RDTL), José Ramos-Horta partisipa iha semináriu nasional ho tema “Konsolidasaun entre Estadu no Akadémiku sira hodi mantein reziliénsia ba sustentabilidade nasaun nian” Semináriu ne’e sai hanesan espasu importante ida atu hamutuk lider Estadu, akademista, estudante universitáriu no parseiru dezenvolvimentu sira hodi diskute kona-ba papel edukasaun, peskiza sientífika no lideransa iha konstrusaun Timor-Leste ne’ebé forte, modernu no sustentavel.
Iha ninia intervensaun, Prezidente Ramos-Horta subliña katak Timor-Leste presiza líder sira ne’ebé iha kapasidade no vizaun klaru hodi hatán ba dezafiu globál sira, liu-liu agora nasaun ne’e adere ona ba ASEAN.
“Nasaun ida presiza lider ida ne’ebé iha kapasidade, vizaun klaru no abilidade komunikasaun ne’ebé di’ak,” dehan Prezidente Ramos-Horta.
Nia salienta mós importánsia kolaborasaun entre Estadu no setór akadémiku hodi garante asesu públiku ba peskiza no konkretu.
“Dezenvolvimentu sustentavel presiza reziliensia, inovasaun no partisipasaun husi grupu juventude hotu,” nia hateten.
Atmosfera semináriu ne’e la’ós de’it kona-ba polítika no governasaun, maibé mós estudu inspirativu ida ba estudante no juventude sira hodi reflete kona-ba sira-nia responsabilidade iha konstrusaun nasaun.
Iha fatin hanesan, Lere Anan Timur hato’o diskursu badak kona-ba oinsa sai sidadaun ne’ebé di’ak iha nasaun demokrátiku, ho liafuan simples maibé klean, nia hanoin katak ema ida bele muda no aprende atu sai di’ak liután iha tempu.
“Maske ema ida-idak lahanesan, maibé sidadaun ida bele aprende no kapasita an atu sai di’ak liután husi tempu ba tempu,” dehan Lere Ana Timur.
Nia hatutan tan katak responsabilidade, justisa no onestidade nu’udar valór importante ba sidadaun ida.
“Povu nia konfiansa hanesan kapital ida ne’ebe importante ba lideransa sira, tanba ne’e lideransa sira tenke servisu ho sinseridade no transparensia,” nia hateten.
Tuir nia, sidadaun laos deit iha direitu, maibe iha mos dever atu respeita lei, buat sira ba dezenvolvimentu no mantein paz iha rai laran. Nia konsidera dixiplina no respeitu hanesan importante atu forma karakter sidadaun ne’ebé di’ak.
Iha finál semináriu ne’e, Lere Ana Timur husu ba povu atu hametin unidade nasionál no husik hela hanoin negativu sira atu nune’e Timor-Leste bele la’o nafatin ba oin ho pás no estabilidade, sidadaun hotu-hotu tenke hadi’a-an no hametin unidade nasionál atu garante esplorasaun sustentável ba Timor-Leste.
Jornalista Estajiiada : Caryn
Editor : Ana Maria da Silva
