(Dilí) Kampung Merdeka, 21 Maiu 2026 – Iha tempu ne’ebé difikuldade ekonomia sei sai dezafiu ba família barak iha Timor-Leste, joven ida naran Marcus Mendez hatudu katak badinas no determinasaun bele lori mudansa bo’ot ba moris família.
Ho kapitál ki’ik hamutuk de’it dolar amerikanu 15, Marcus hili atu hahú negósiu fa’an nu’u no lori hale’u Bairo sira iha Dili laran hodi ajuda no sustenta família nia nesesidade loro-loron.
Agora dadaun, rezultadu husi nia esforsu hatudu mudansa positivu, tanba kada loron nia bele hetan rendimentu to’o dolar amerikanu 90 ka liu tan, depende ba nia badinas no tempu ne’ebé nia uza atu fa’an no lao ain tama sai bairo sira.
“Tanba ekonomia la sufisiente, hau foti desizaun atu fa’an nu’u iha Dili laran. Maske dala ruma sente kolen no hasoru dezafiu balu, hau sei forte nafatin atu luta ba moris,” dehan Marcus Mendez iha Kampung Merdeka, Kinta-feira (21/05/2026).
La’ós de’it fa’an iha fatin ida, maibé nia lori mós nia nu’u hale’u husi bairo ida ba bairo seluk iha Dili hodi buka kliente no aumenta rendimentu.
Nia esplika katak osan ne’ebé hetan husi negósiu ne’e uza atu ajuda inan-aman no sustenta família. Ba nia, responsabilidade oan mane nian maka ajuda família, liuliu bainhira inan-aman hahú katuas no sira nia forsa menus ona.
“Loron ida hau bele hetan to’o dolar amerikanu 90 ka liu, depende ba hau nia badinas tama-sai iha bairo sira,” nia hatutan tan.
Istória inspirativu husi Marcus Mendez sai ezemplu di’ak ba joven sira seluk katak susesu la presiza hahú ho kapitál bo’ot. Ho vontade forte, badinas no perseveransa, joven sira bele kria oportunidade atu muda moris família ba futuru ne’ebé di’ak liután.
Jornalista /Estajiária : Caryn / Bety
Editora : Ana Maria da Silva
