Iha preparasaun ba Kongresu Nasionál Partidu Fitun, Dr. Abílio Araújo hato’o mensajen importante kona-ba luta ukun-rasik’an, solidariedade no responsabilidade atu kontinua servisu ba povu no nasaun.
Iha nia intervensaun, Dr. Abílio Araújo hanoin fila-fali tempu luta nasional no nia relasaun ho saudozu Nikolau Lobato durante tempu kontrolu husi FRETILIN. Nia dehan katak durante ne’ebá sira sempre halo komunikasaun di’ak no servisu hamutuk ba interese povu Timor-Leste.
“Ha’u sempre koinese Saudozu Nikolau Lobato hanesan ema ne’ebé fó nia raan no nia moris tomak ba luta libertasaun Timor-Leste,” hateten Dr. Abílio Araújo iha konferensia emprensa foin lalais ne’e.
Nia mos esplika katak durante tempu resisténsia to’o referendu, iha kontribuisaun bo’ot husi komunidade Timoroan iha Austrália ne’ebé ajuda organiza estrutura ba RDTL no fó apoiu ba movimentu independénsia.Nia mos apresenta, depois independénsia, prioridade importante ida mak kontinua dezenvolve infraestrutura no ekonomia nasional atu povu bele senti rezultadu husi ukun-rasik a’an.
“Povu mak liberta pátria to’o ohin loron, povu mak sei hamrik atu koalia no determina nia futuru rasik,” dehan nia
Nia mos husu ba membru no simpatizante Partidu Fitun atu hametin organizasaun no valoriza istória luta nasional, tanba independénsia la’ós deit simbolu polítika, maibé tenke lori soberania iha área hotu.
“Independénsia sesál mak soberania. Soberania polítika, soberania ekonomika no soberania kultural,” nia afirma.
Iha oportunidade ne’e, nia mos relata kona-ba nia esperiénsia bainhira fila mai Timor no haree diretamente moris susar povu iha bairu no foho sira, nia dehan situasaun ne’e sai motivasaun boot ida atu kontinua luta ba povu ki’ik sira. Enkunatu iha atmosfera preparasaun Kongresu Nasionál Partidu Fitun lao ho entuziazmu no espiritu unidade, ho esperansa katak kongresu ne’e bele sai etapa importante ida atu hametin estrutura partidu no aproxima liután ho povu.
Jornalista /Estajida : Sandra/ Domingas
Editor : Ana Maria da Silva
