Dilí, Farol, 14 Maiu 2026 — Polícia Científica de Investigação Criminal (PCIC) selebra aniversáriu ba dala 12 ho tema “Fortalecimento da Justiça e da Segurança Nacionais no Combate à Criminalidade Organizada e Transnacional” iha Salão GMN, Farol, Dili.
Diretor Nasional PCIC, Vicente Fernandes e Brito, hatete durante tinan 12 PCIC konsege hetan progresu boot liu husi koperasaun nasional no internasional, maski instituisaun ne’e nafatin hasoru dezafiu oioin iha kombate krime organizado no transnasionál.
” krime transnasionál ohin loron la iha fronteira no aumenta liu husi teknologia digital, tanba ne’e PCIC kontinua hametin kapasidade investigadores no espesialista sira liu husi formasaun no koperasaun ho nasaun parseiru sira.”Hateten Diretor PCIC ba Jornalista sira foin lalais nee , iha ambitu komemorasaun loron Aniversariu PCIC ba dala 12 iha salaun GMN-Bebora
Diretor Vicente mos revela katak PCIC asina ona memorandu entendimentu ho nasaun hanesan Australia no Indonesia atu hasa’e kapasidade investigasaun kriminal no dezenvolve laboratóriu investigasaun sientífika iha futuru.
Nia esplika katak dezafiu boot ida mak krime sibernétika no rekolha prova dijitál, liuliu husi telemóvel no komputadór suspeitu sira nian. Tanba ne’e, PCIC presiza investimentu iha ekipamentu modernu no formasaun espesífiku atu responde lalais ba kazu sira ne’ebé envolve dadus eletróniku.
Relaciona ho jogu online, Diretor Vicente hatete katak PCIC implementa ona rezolusaun governu hodi taka atividade ilegal sira no halo apreensaun ba ekipamentu eletróniku relevante. Nia mos informa katak agora PCIC loke fali nia website atu fasilita sidadaun sira hato’o keixa ka informasaun kriminal ho maneira seguru no konfidensiál.
Kona-ba kazu droga sira ne’ebé akontese iha tinan 2024 no 2025, Diretor Vicente afirma katak prosesu investigasaun sira remete ona ba Ministério Públiku. Nia esclarece katak arkivamentu parcial la signifika kazu taka definitivamenti, maibé sei bele reabre bainhira prova foun mosu.
Aleinde ne’e, nia reafirma prinsípiu imparsiálidade PCIC nian, ne’ebé la haree ema nia pozisaun sosial ka poder bainhira halo investigasaun kriminal. Segundo nia, justisa tenke aplika hanesan ba ema hotu.
Diretor Vicente mos alerta katak aeroportu Timor-Leste durante ne’e sai pontu tranzitu ba kazu balu relasiona ho droga no krime transnasionál. Maibé, PCIC kontinua halo monitorizasaun rigorozu no investiga kazu sira ne’e ho baze ba provas konkreta.
Ikus liu, Diretor Nasional PCIC informa tan investigasaun kona-ba moeda falsu US$100 sei hela nafatin iha prosesu investigasaun no autor seidauk identifika oficialmente.
Serimónia aniversáriu ne’e sai momentu importante atu reafirma komitmentu PCIC iha hametin estadu direitu demokrátiku no proteje seguransa sidadaun Timor-Leste nian.
Jornalista/ Estajida : Domingas / Beatris
Editor :Ana Maria
