(DÍLI), Caicoli 25/05/ 2026 – Joven no inan ida ne’ebé hala’o negósiu ki’ik iha kapitál Díli hatudu vontade no esperitu ne’ebé a’as tebes, maske sira na’in rua enfrenta difikuldade ekonomia no limitasaun iha moris loron-loron, maibe sira na’in rua kontinua servisu maka’as ho vontade ne’ebé di’ak atu sustenta família no asegura edukasaun ba futuru ne’ebé di’ak liu.
Joven ida ho naran Abrão da Costa Ximenes, husi Munisípiu Viqueque, dadaun ne’e hala’o hela negósiu hanesan fa’an sigaru iha área kampus sentrál hodi ajuda sustenta nia moris no kontinua kursu lian Korea,
Abrão ne’ebé hela iha Bidau Santana, konta katak nia hili dalan ida ho fa’an sigaru iha area kampus sentral Caicoli ne’e tanba hakarak aprende moris independente no la depende de’it ba inan-aman.
“Moris ne’e tenki esforsu tamba ami bo’ot ona, la bele depende de’it ba inan no aman,” dehan Abrão iha Caicoli 25/05/2026
Nia esplika katak, depois kursu lian Korea remata, nia la fila diretamente ba uma, maibé kontinua fa’an sigaru atu bele hetan osan ba nesesidade loron-loron no selu kursu.
Nia hahu halo negósiu ho osan montante $15 dolar, to’o agora Abrão bele hetan rendimentu liu husi $5 kada loron, depende ba númeru kliente parte hosi rendimentu ne’e nia uza fila fali atu sosa sasan no mantén negósiu kontinua la’o ba oin .
Nia mós hatete katak sentimentu moe la bele sai razaun atu hakotu luta ba moris, nia konsidera negósiu ki’ik nu’udar oportunidade ida atu aprende responsabiliza-an no bele prepara ba futuru.
Iha fatin hanesan inan ida ho naran Rofina de Jesus, husi Munisípiu Díli, mós hala’o negósiu ki’ik ida iha área Kampus sentral nia oin no nia fa’an nasi bungkus, kafé no sigaru hodi ajuda sustenta família no hodi no selu nia oan sira bele asesu ba edukasaun.
“Ha’u hahu halo negósiu ne’e ho osan montante $30 dolar to’o agora no ha’u aumenta tan negósiu, hanesan fa’an tan kafé no sigaru hodi bele aumenta rendimentu kada loron,” dehan Rofina iha Caicoli 25/05/2026
Rofina mós , hatete katak nia iha oan nain ha’at no nia servisu maka’as loron-loron tanba hakarak haree oan sira hetan edukasaun di’ak no iha futuru liu husi nia moris agora nia oan na’in tolu maka tama ona ba banku universidade, no ida sei tur iha banku pré-sekundária.
“Ha’u la baruk atu esforsu tanba ha’u hakarak ha’u nia oan sira iha futuru di’ak liu ha’u, maske susar, hau sei luta nafatin,” nia hatete.
Nia mós fó mensajen ba feto sira atu iha inisiativa rasik no la depende de’it ba ema seluk atu muda moris família.
“Feto sira tenki sai inspiradora ba oan sira, keta hein de’it ba la’en ka ema seluk ita rasik tenki buka dalan atu sustenta família,” nia hakotu.
Istória Abrão no Rofina hatudu katak, maski ho kapitál ki’ik no situasaun limitadu, maibé vontade atu luta no servisu maka’as bele sai dalan ida hodi transforma moris no harii futuru ne’ebé di’ak liu.
Jornalista/Estajiada : Caryn
Editor : Ana Maria da Silva
