Díli, 21 Abril 2026 – Polísia Nasionál Timor-Leste (sigla-PNTL) liuhusi Unidade Polísia Marítima (Sigla-UPM) konsege kaptura sidadaun Indonezia hamutuk 32 ho ikan tonelada sia (9) iha operasaun peska ilegál iha tasi kosta sul, área Uatocarbau, munisípiu Viqueque.
Kaptura ne’e akontese durante Operasaun Patrullamentu loron lima iha area tasi Kosta Sul entre Beaço no Uatokarbau iha loron 16 Abril 2026 iha tuku 18:00 OTL, bainhira ekipa UPM detekta ró peska ho naran KM Makmur Rejeki Mulya ne’ebé halo atividade ilegál iha zona marítima entre Beaço no Uatocarbau. Operasaun ne’e hanesan parte husi patrullamentu no vizilánsia ne’ebé hala’o desde loron 13 Abril.
Komandante Unidade Polísia Marítima, Superintendente Xefe Polísia Eugénio Pereira, hatete katak parte UPM la envolve diretamente iha prosesu investigasaun tanba kompeténsia ne’e iha Lautém nia komandu.
“UPM fó informasaun kona-ba atividade operasaun ne’ebé liga ho nia misaun, papel UPM nian bazeia ba dekretu-lei ne’ebé fó responsabilidade atu halo supervizaun no prevensaun hasoru atividade ilísitu sira iha zona marítima Timor-Leste”, dehan Komandante Unidade Polísia Marítima, Superintendente Xefe Polísia Eugénio Pereira, ba jornalista sira hafoin serimónia tomada pose iha segunda-feira, 20/04/2026.
Superintendente Xefe Polísia Eugénio Pereira, hatete, atuasaun ne’e realiza iha flagrante delitu, nune’e autoridade sira konsege asegura ró, ikan no suspeitu hotu-hotu iha fatin.
“UPM halo atuasaun tuir nia misaun atu prevene no kombate atividade ilísitu iha zona marítima, inklui peska ilegál ne’ebé bele prejudika rekursu tasi Timor-Leste,” hatete Eugénio Pereira,
Komandante hatutan, Suspeitu sira lori ba komandu Lautém hodi halo prosesu investigasaun durante oras 72, no depois aprezenta ba Tribunal Judisial Primeira Instánsia Baucau ba primeiru interogatoriu.
Tuir despaixu tribunal nian, autoridade deside atu asegura provizoriamente suspeitu sira iha Prizaun Bekora, enkuantu hein prosesu investigasaun kontinua ne’ebé sei hala’o iha loron 24 Abril 2026. No operasaun sira hanesan ne’e sei kontinua atu reforça kontrolu no seguransa iha tasi Timor, ho objetivu atu kombate peska ilegál no proteje rekursu marítimu nasionál.
Jornalista : Media PNTL
Editor : Francisco Pereira
