(Díli, 13 Fevereiru 2026) Bedois – Prezidente Institutu Nasional de Combate ao HIV-SIDA (INCSIDA, I.P), Daniel Marçal, informa, númeru husi kazu HIV-SIDA iha Timor-Leste kontinua aumenta iha tinan ikus ne’e. Tanba fatór ida ne’ebé konsidera kontribui makaas ba aumentu ne’e mak prátika komersiál sexu livre no relasaun seksuál ne’ebé la uza protesaun.
“Komersial sexu la uza prezervativu no falta informasaun kona-ba prevensaun HIV sai hanesan risku boot ba tranzmisaun moras ne’e. Ema barak seidauk iha konsiénsia atu halo testajen regulár no uza prezervativu bainhira halo relasaun seksuál,” hatete Daniel Marçal iha Bedois, Sesta (13/02).
Tuir Prezidente, kazu foun sira deteta liuhosi testajen voluntáriu no kampaña sensibilizasaun iha sentru saúde no ospitál sira. Aumentu ne’e la’ós de’it akontese iha área urbana hanesan Díli, maibé hahú mosu mós iha munisípiu sira seluk.
“Kazu HIV agora sa’e tan ba iha 2.560. tanba ne’e mak husu ba ita hotu atu tau atensaun ba iha virus HIV-SIDA ne’ebé buras iha ita-nia sosiedade ida ne’e, se ita ida-idak la kuidadu an no la halo tratamentu ba problema tranzmisaun virus HIV-SIDA, Timor-Leste sei sai Risku Boot,” nia dehan.
INCSIDA nafatin kontinua halo kampaña edukasaun no distribuisaun prezervativu atu prevene tranzmisaun HIV no moras seksuál transmisível sira seluk. HIV sa’e makas tanba tranzmite husi sexu livre ne’ebé la iha protesaun, ko’alia kona ba relasaun sexual ne’e difisil atu hapara tanba ne’e ema nia direitu, Maski nune’e, ita hotu iha responsabilidade atu prevene moras ne’e liuhosi fahe informasaun ne’ebé loos no prátika ho seguru,” nia hakotu.
Jornalista: Francisco Pereira/Olersio Carvalho (Estajiadu)
Editor : Joenaca da Conceção
