Dili 24-08-2024 Fundasaun Haburas organiza Laboratoriu Komunidade, hodi fo oportunidade ba sidadaun sira no jornalista sira interese iha ambiente no klima oportunidade ida atu identifika problema ambiental nebe relevante iha sira-nia komunidade.
Lab Komunidade hanesan parte ikus husi treinamentu jornalizmu ambiental Let’s Talk Climate (Mai Koalia Konaba Mudansa Klimatika), organiza husi Fundasaun Haburas no financia husi DW Akademie. Eventu ohin loron sei hahú ho diskusaun panel no sei kulmina iha live painting ne’ebe foka ba efeitu sira husi mudansa klimátika nian.
Diskusaun dahuluk iha dader, lori orador sira husi media, jornalista, no ativista foinsa’e sira hamutuk atu dada-lia konabá papél media atu halo reportajen no kontestualiza problema ambiente no alterasaun klimátiku, haree ba oinsá komunidade sira hetan afetadu iha sira-nia moris lor-loron nian, liga ho seguransa ai-han, asesu ba bee, seguransa biodiversidade marina, no reziliénsia klimátika.
Diskusaun ida ne’e rekoñese katak média iha pápel úniku atu hasa’e konsiensia públiku ida ne’ebé informadu liu-tan kona-ba alterasaun klima, no mós influencia autoriadade sira hodi haree ba kestaun mudansa klimátika iha Timor-Leste. Liu husi reportajen ambiente ne’ebé akuradu, transparante, no efetivu, tantu husi média ka husi sidadaun jornalizmu (citizen journalism), jornalista no ativista foinsa’e sira iha abilidade atu puxa polítiku-nain sira atu fó prioridade ba investimentu iha prontidaun klimátika no promove justisa klimátika iha Timor-Leste.
Orador sira ba diskusaun mak Ato Lekinawa Costa, xefe redasaun NeonMetin, David Noano Ximenes, jornalista independente, Filomena da Conceição, jornalista NeonMetin, no Isaura Barros, kordenadora Movimentu Laudato Si Timor-Leste.
Parte daruak husi atividade mak live painting. Artista sira hanesan Mau Karuk, Amaral, Uku Karuk, Nilton, no Bek ne’ebé involve iha transforma istória ambiente nian sai espresaun arte.Uza estilu realizmu no surealizmu, artista sira nia pintura subliña problema ambiente nian hanesan lixu, poluisaun plástiku, no esperansa foun ba futuru.
Artista hanesan maun Amaral mós uza nia arte hanesan espresaun protestu ida ba makaer-ukun nain sira ne’ebé halo explorasaun ba povu, koruptu, no hamate ambiente. Liu husi kriatividade innovativu, artista sira dezafia narrative tradicional no provoka pensamentu atu hamoris audensia sira nia involvimentu ho mós isu vital hanesan sustentabilidade ambiental no mudansa klimátika.
Kombina espresaun artistiku ho ativismu, artista sira ne’e uza sira-nia talentu atu halo konsientizasaun públiku, ajuda diálogu, no inspira asaun no advokasia ba problema ambiente no mudansa klimátiku.
