(Dili) Mudansa – Ema hotu mai ho hanoin kreativu rasik maibé ema balun hakarak hahú hala’o atividade ho ekipamentu kompletu no ema balu hakarak hahú husi zero tan ema ida-idak diferensia ideolojia.
Joven kreativu liman badaen ho naran Rivelino Barros Gonçalves “Ary Bargon” ho inisiativa rasik hakarak kria kampu traballu ba nia an Husi zero (mamuk) tanba fiar liu ba ninia esperiénsia ne’ebé bele prodús estátua to’o agora hodi marka istória úniku
“Ha’u hakarak kria istória úniku uitoan mai husi hanoin no esperiénsia ka koñesimentu ne’ebé iha. Ha’u haree ba eskultor ba halo estátua ne’e mak ha’u nia servisu duni maibé ha’u hahú halo atividade ne’e husi nol,” dehan Ary Bargon ba média mudansa iha nia rezidénsia Kampung Baru Dili, Kinta, 15/02/2023.
Foin-sa’e Metan Morena ne’e afirma, mehi ho profisaun prodús estátua to’o remata tanba nia konsidera atividade komedia ne’e hanesan divertimentu ida ba ema no audiénsia sira.
“Ha’u hanoin importante tebes bainhira kria rasik kampu traballu ba ita-nia an, tanba ita moris mai maromak fó ona ema ida-idak nia servisu hanesan halo estátua, fotografia, arte, pintura no bola ne’e nia bele dezenvolve nune’e Ita kria istória úniku uitoan”, dehan nia.
Ary Bargon haktuir, ema ida-idak iha nia kreativu rasik buka dezenvolve hodi habelar ba públiku nune’e ema hotu bele hatene no rekoñese profisaun ne’e
“Hobi bele sai ha’u-nia karreira atu bele hetan osan husi ne’ebá, estátua ne’ebé ha’u halo konsidera ne’e hobi maibé hanesan profisaun ha’u mós tenke respeita nian kuandu ha’u hatene dezenvolve ba oin liu husi ita-nia talentu bele sai karreira profisionál,” nia esplika.
Ary Bargon tenke prontu fakar osan hodi prodús estátua nune’e oferese ba ema koñesidu sira, husi maneira ne’e ema hotu fiar nian rekoñese nia obra ne’ebé prodús ona
“Ha’u mós prodús estátua no halo ona surpreza ba ema boot sira hanesan lider nasionál Avo Xanana, daudaun ne’e tau iha Xanan Reding Room, ikus avoo Nana simu duni ho kontente no apresia ba obra ne’ebé ha’u fó,” Liman Badaen ne’e relata.
Momentu ne’ebá aproveita halo promosaun prodús estátua husi lider nasionál Karismatika Kayrala Xanana Gosmão, hafoin média habelar nia profisaun ne’e ba públiku no ema barak mak hatene ona.
“Se ema la pesan ha’u bele prodús estátua seluk para fa’an fali hodi hetan osan, ha’u lakohi abandona servisu halo estátua ne’e, tanba se halo servisu seluk la bele halo ona estátua ne’e” nia afirma
Mane bonitu ne’e esklarese, sai funsionáriu públiku servisu husi segunda to’o sesta mak kliente sira pesan nia pasta sei la biban atu halo estátua ne’e
“Tanba ne’e ha’u la husu apoiu ruma husi ema seluk ka inan aman sira maibé ha’u esforsu rasik ba buat ne’e ita hakarak halo no iha rezultadu ho kualidade di’ak furak ba ema hotu nia matan,” Ary Bargo deklara.
Ary Bargo la hetan apoiu husi parseiru no governu maibé nia prontu hasai osan realiza buat ne’ebé hakarak hodi promove nia talentu no kreatividade ba públiku.
“Ha’u nia mehi prodús estátua ne’e husi esforsu no kosar been rasik la tane liman ba família no maun alin sira, Ita mehi ona profisaun ida ne’e ita tenke rai osan ne’ebé hetan husi atividade seluk, hodi sosa fali materiál ne’ebé presiza hola atu prodús estátua ida” nia konta
Uza materiál ne’ebé prodús estátua uluk to’o mak hanesan: rai, du’ut, sementi, rai-henek, besik, grinda, mesín solda, kanuru, tudik uza ba okir estátua no ikus uza kompresór mak pinta de’it nune’e bele kabeer furak ba ema hotu nia matan
“Tudik ne’ebé ha’u uza hodi okir estátua ne’e dala barak ha’u halo rasik de’it tanba buat ne’e ita bele halo de’it tudik nia modelu ne’e hanesan atu ba okir duni estátua”.
Ary Bargon hahú prodús estátua iha 2016 to’o mai agora ema barak mak hola ona nia prodús husi liman badaen ne’e.
Nia konta Ema pesan halo lai estátua ba matebian ruma nian atu tau iha rate, monumentu ne’ebé husi 2016 atu tama 2017 ne’e komesa iha ona kliente balun mai hameno, husi ne’ebá loos duni ema fiar ona katak ha’u halo estátua.
“Iha 2023 ne’e loloos ha’u halo ona maibé ha’u mós halo hela estátua ida iha foho ne’ebé ha’u kansela hela ida iha Dili ne’e, provizóriu ne’e ha’u halo ida iha foho Kuandu ha’u halo estátua foun sei públika nune’e ema barak bele fahe ba tutan,” nia hakotu.
Jornalista : Ekipa MediaMudansa
Editór : Orlando Magno