(Díli) Comoro- La fasíl atu hala’o moris iha sidade, tanba ne’e Agostinho foti desizaun empresta ema nia osan ho montante $120.00 hodi utiliza ba selu kos no hala’o negósiu fa’an sigaru no Pulsa iha merkadu Comoro.
Moris iha sidade Díli la fasíl hanesan saida mak ema imajina, tanba ne’e Agustinho Soares hili dalan hala’o negosiu nune’e antes nia hahú negosiu, nia empresta ema nia osan $ 120.00 hodi halo negósiu hanesan fa’an sigaru no pulsa iha merkadu Comoro hodi fasilita nesesidade loro-loron nian no bele hatutan moris ba tempu naruk.
“Ha’u empresta ema nia osan $120.00, ha’u uza tiha $ 50.00 hodi selu kos, falta $60.00 no sasan uma laran seidauk sosa entaun ha’u sosa de’it sana ida, foos $ 5.00 nian, nune’e osan restu ha’u uza hodi sosa fali sigaru no pulsa hodi fa’an, husi ha’u nia negósiu ne’e kada loron ha’u hetan $ 5.00, husi osan ne’e ha’u uza ba nesesidade uma laran, uza ba selu bemo, selu ha’u nia kursu to’o ha’u foti sertifikadu no ha’e selu mós ema nia osan ne’ebé mak ha’u empresta”, dehan Agostinho ba Média Mudansa iha Kampun Baru, Segunda 06/10/2025
Negosiante ne’e hatutan, osan ne’ebé nia hetan husi halo negósiu fa’an sigaru no pulsa nia uza balu ba nesesidade loro-loron no hodi sosa mós sasan negósiu nian.
“Osan ne’ebé ha’u hetan husi fa’an sigaru no pulsa ne’e nia funan ha’u uza ba nesesidade loro-loron nian no balu ha’u tau atu bele uza hodi sosa fali sigaru no pulsa”, haktuir Agostinho
Nia hatutan, difikuldade ne’ebé mak dau-daun ne’e nia hasoru hanesan iha uma laran hela de’it sira nain tolu (3), tanba ne’e nu’udar maun bo’ot Agostinho foti desizaun halo negósiu atu atende ba sira nia nesesidade loro-loron nian.
“Iha ami nia família hela de’it ami nain tolu (3), ha’u nia maen mate ona iha tinan 2005 no pai forma fali família seluk, entaun ema atu tau matan ba ami ne’e laiha ona, entaun ami tenki buka rasik atu bele fasilita fali nesesidade loro-loron, agora laiha ema ruma mak tau matan mai ami”, konta negosiante ne’e
Agustinho Soares husi Munisípiu Ermera, Postu Administrativu Hatulia, Suku Manosai, Aldeia Baua no dau-daun ne’e nia hela iha aldeia 4 de setembro suku Comoro, Postu Administrativu Dom Aleixo.
Jornalista :Juliana Pacheco /Zezinho de Jesus Soares
Editora :Sandi Belo
