(Díli) Comoro- Centro Nacionál Chega I.P (CNC sigla português) realiza atividade sensibilizasaun iha Eskola Ensinu Sekundáriu Jéral Finantil ho objetivu atu promove no valoriza Direitus Umanus, Igualidade Jéneru no Rezolusaun Konflitu ba estudante sira.
Diretór Eskola Ensinu Sekundária Jéral Finantil, Aniceto Berlelo, hatete, atividade ne’e importante tebes tanba bele ajuda estudante sira atu kompriende istória no realidade Timor-Leste liu husi perspetiva direitus umanus.
“Ami kontente tanba estudante sira bele aprende direta husi (CNC) kona-ba istória, rezolusaun konflitu no igualdade jéneru, ne’e sei fó kontribuisaun bo’ot ba edukasaun”, dehan Diretór, Aniceto Berlelo ba Jornalista sira iha Eskola Finantil, Kuarta, 27/08/2025.
Nia hatutan, Centru Nacional Chega (CNC) hahú ko’alia kona-ba istória rezisténsia no rezolusaun konflitu hodi sosializa ba estudante no professor sira, liu-liu sira ne’ebé hanorin matéria istória iha eskola, objetivu mak atu fó oportunidade ba estudante sira atu hatutan hanoin kritiku no aprende liu husi programa CNC nian.
“Ohin representante husi Ministériu Interior mós partisipa iha atividade ne’e, ho mensajen atu prevene konflitu no hado’ok estudante sira husi konflitu ho valor solidariedade, dala barak konflitu mosu tanba informasaun sala, entaun estudante sira tenki aprende lia-los, rezolve problema ho dalan di’ak, no hadomi malu atu dezenvolve Timor-Leste”, hatutan diretór
“Atividade ida ne’e parte husi esforsu CNC atu kontinua sosializa istória rezisténsia povu Timor ho valór fundamentál direitus umanus ba jerasaun foun iha sosialisasaun, (CNC) fó esplikasaun kona-ba esperiénsia rezisténsia povu Timor, ensinamentu kona-ba konflitu no dalan atu evita violénsia, estudante sira mós hetan oportunidade atu husu perguntas no partilla hanoin sira”, tenik nia
Entretantu Centru Nacional Chega (CNC) sei kontinua realiza programa hanesan iha eskola sira seluk iha rejiaun sira hotu iha Timor-Leste, ho objetivu atu aumenta konsiénsia públiku kona-ba direitus umanus no igualdade jéneru.
Jornalista: Inácio Silva
Editora: Sandi Belo
