(Díli), Taibesi, 28/05/2026 – Maske idade ona no enfrenta difikuldade moris loron-loron maibe nafatin halo negosiante, Armando Maia, husi Munisípiu Bobonaro ho idade tinan 76, kontinua hala’o nia negósiu ki’ik iha Merkadu Taibesi hodi sustenta nia família no asegura nia oan sira bele asesu ba edukasaun formal no naun-formal.
Negósiu ne’ebé nia hala’o mak fa’an sapatu iha merkadu taibessi, Armando Maia, konta atividade ida-ne’e la’ós de’it fonte rendimentu, maibé mos sai meiu importante atu suporta nesesidade família loron-loron.
Armando Maia hateten katak nia hahú fa’an sapatu desde tinan 2017 no to’o agora sei kontinua nafatin, maski idade lao ba bebeik, maibe nia la kole atu luta ba moris no sustenta nia oan sira nain sia iha nia familia.
“Ha’u hahú fa’an sapatu iha tinan 2017 to’o agora, ha’u mós iha oan nain sia (9), no balu sei kontinua eskola iha banku segundária, durante ha’u fa’an sapatu ne’e mak ajuda suporta oan sira ba eskola no kursus, ohin loron, ha’u nia oan balu konsege susesu no servisu iha rai-liur,” dehan Armando Maia iha Taibesi, 28/05/2026.
Nia esplika katak durante tempu ukun-an nia komesa hala’o atividade ki’ik balu ona, maibé negósiu fa’an sapatu mak fó oportunidade bo’ot liu atu ajuda sustenta moris família.
“Ho negósiu ida-ne’e mak ha’u sustenta oan sira ba eskola to’o balu susesu ona, ha’u nia oan sira dala barak husu ha’u atu deskansa de’it iha uma tanba idade ona, maibé ha’u hakarak kontinua nafatin atividade ida-ne’e, karik deskansa de’it, ha’u sente hanesan moras,” nia hateten.
Tuir nia, rendimentu hosi fa’an sapatu la permanente no depende ba situasaun merkadu, iha loron balu nia bele hetan rendimentu to’o $15, maibé dala ruma menus husi $7 to’o $8.
“Osan hosi fa’an sapatu ne’e ha’u uza hodi sosa modo ba han nian, kada loron, dala ruma ha’u hetan $15, maibé bainhira menus mak $7 ka $8 de’it,” nia dehan.
Armando Maia mós konta katak bainhira hahú negósiu ne’e, nia uza osan kredit hamutuk $1.700 hodi komesa sosa sasán ba fa’an, to’o agora, nia sei kontinua selu kredit ne’e kada fulan ho montante $41.
“Antes hahú negósiu ne’e, ha’u halo kredit osan hamutuk $1.700 hodi sosa sapatu ba fa’an, kada fulan ha’u tenki selu fali $41, no osan ne’ebé restu mak ha’u uza hodi sustenta ekonomia família,” nia esplika.
Maski rendimentu ne’ebé hetan la bo’ot, Armando Maia kontinua esforsu atu atende nesesidade família no ajuda oan sira nia edukasaun.
Jornalista/ Estajiada: Caryn Camões / Dina
Editor : Ana Maria da Silva
