(Dili), Katedral 16 Maiu 2026- komunidade sarani katólika iha Igreja Catedral de Díli halibur malu iha misa rekuém hodi fó omenajen ikus ba maktoban nai’in rua, Padre Domingos da Silva Soares “Mau-Bere” no Padre Aníbal da Costa, ne’ebé durante sira nia moris dedika a’an tomak ba servisu Maromak no komunidade sarani.
Kardinal Dom Virgílio do Carmo da Silva, ne’ebé iha nia omelia hato’o katak padre rua ne’e mak Maromak nia “bibi-atan” sira ne’ebé servisu ho domin, fidelidade no sakrifísiu ba ema hotu.
”Padre Domingos Mau-Bere mak amu ida ne’ebé iha vontade forte atu haklaken Maromak nia liafuan. La’ós deit servisu hanesan amu, maibé mos sai hanesan aman ida ba labarik no juventude sira ne’ebé hakbesik an ba Igreja, durante nia vida pastoral, nia kontinua fó motivasaun no hanorin sarani sira kona-ba doutrina, fiar no esperansa” Hateten Kardinal Dom Virgílio do Carmo da Silva iha omilia ba sarani sira, 16/05/2026
Iha omelia ne’e mos, Kardial husu deskulpa ba sarani katólika sira hotu karik durante Padre Domingos nia moris iha hahalok balu ne’ebé ladun di’ak iha komunidade, nia dehan katak ema hotu iha limitasaun, maibé servisu no sakrifísiu ne’ebé nia halo sei nafatin sai ezemplu di’ak ida ba gerasaun tuir mai.
Kardial mos konsidera Padre Domingos nia luta no dedikasaun hanesan kontribuisaun boot ida ba Igreja Katólika iha Timor-Leste, nia hateten katak moris no knar ne’ebé padre ne’e halo ona sai parte ida husi istória importante Igreja nian. Nia mos lembra katak laiha ema ida mak hatene loron mate, tanba tempu moris no mate hotu iha Maromak nia liman.
Iha parte seluk, reprezentante família husi Padre Domingos Mau-Bere hato’o agradese ba ema hotu ne’ebé fó apoiu, orasaun no solidariedade durante tempu susar ne’e família mos husu deskulpa ba komunidade sarani sira karik durante maktoban nia moris iha atitude ruma ne’ebé la agradavel.
Misa rekuém ne’e lao ho atmosfera triste maibé dignu, ho prezensa sarani barak ne’ebé mai hodi fó respeitu no despedida ikus ba maktoban nai’in rua ne’ebé durante sira nia moris servi ho laran tomak ba Igreja no povu.
Jornalista /Estajida : Caryn Camões
Editor : Ana Maria da Silva
