(Díli) Formoza — hamrik hamutuk ho nia karoxa iha dalan ninin área Formosa, Isac Ruak da Costa, joven husi Viqueque ne’e, kontinua tahan loron no udan prontu atu servi hirak ne’ebé hakarak hemu nú nurak fesku iha tempu manas kapitál nian, ba Isac negósiu ki’ik ida ne’e sai fonte prinsipál atu sustenta nia família.
Isac hatete, desizaun atu fa’an nú mai tanba situasaun ekonomia família la sufisiente atu sustenta nesesidade loroloron.
“Tamba ekonomia família la to’o, ha’u desidi atu fa’an nú hodi ajuda ha’u nia Aman no Inan,” nia dehan.
Nia hahú negósiu nee liu tinan tolu ona ho kapital ki’ik de’it, $20, maske hanesan negósiu simples maibé agora, nia bele hetan rendimentu entre $30 to’o $40 kada loron, depende ba kliente no tempu.
Iha kada dader nia sempre prepara nia nú hodi hein hirak ne’ebé presija nú fresku iha loron manas.
Isac mak oan mane daruak iha família ho maun-alin na’in sia, hafoin remata eskola sekundária, nia hili atu servisu hodi ajuda família no suporta nia alin sira ne’ebé sei eskola.
Nia hanoin fila fali konsellu ne’ebé família fó ba nia:
“Família sempre fó konsellu ba ha’u atu evita moris ne’ebé la produtivu hanesan joga karta ka gastu osan ba tua ho kolega sira, sira hatete ha’u tenke foka ba servisu,”
Osan ne’ebé Isac hetan loro-loron uza ba sosa nesesidade uma laran hanesan ai-han no ajuda selu eskola ba nia-alin sira, ba Isac, fa’an nú iha dalan ninin la’ós deit kona-ba sobrevivénsia, maibé kona-ba responsabilidade no esperansa ba futuru família.
Istória Isac hatudu katak maske ho oportunidade limitadu, jovem sira bele kria mudansa liu husi esforsu nafatin no negósiu ki’ik.
“Se ita la servisu, buat ida la muda ba família.”nia hakotu.
Jornalista/Estajiadu :Madalena da Silva Lopes
Editor :Felisberto F. da Costa
