(Dilí) Becora 04-04-2026– Páskua mak festa importante liu ba kristaun sira, tanba selebra vitória jesus crsitu nia mate no esperansa foun ba ema hotu.
Selebrante Amu Parókia Bekora Bernardo Paiwa iha omilia, hatete festa Páskoa mak simbolu moris foun, ne’ebé hatudu vitória Jesus Kristu nian hasoru mate. nudar maromak nia oan, la hela iha mate laran, maibé moris fali no hetan glória iha aman Maromak nia kadunan.
“Páskoa hanorin ita atu tuir Jesus nia dalan, halo buat ne’ebé loos no defende justisa. Ita sarani sira tenke hatudu ita nia fiar la’ós deit iha liafuan, maibé mos iha hahalok lorloron,” dehan Selebrante Amu Parókia Bekora Bernardo Paiwa iha nia omilia Sabadu alleluia kalan,Bekora.
Nia hatutan sakramentu eukaristia importante tebes ba sarani sira, tanba husi ne’ebá mak hetan forsa espiritual atu kontinua moris tuir kristu nia hanorin.
Iha sorin seluk sarani katólika Geovania Correia Baptista hatete, kontenti ho selebrasaun Páskoa tinan ida ne’e ho preparasaun ba festa lao diak no ajuda komunidade atu hakbesik liu tan ba igreja.
“Hau haksolok tebes tanba bele selebra Páskoa hamutuk ho komunidade. Festa ida ne’e fó dame no kontenti ba ami hotu,” dehan Geovania.
Nia mos fó mensajen ba komunidade atu kontinua hametin dame no unidade iha Timor-Leste, liu-liu iha momentu importante hanesan Páskoa.
Selebrasaun Páskoa iha Díli tinan ida ne’e la’ós deit serimónia relijiozu, maibé mos momentu importante ida atu hametin fiar, esperansa no domin iha sarani sira.
Jornalista/estajiadu : Serafin dos Reis Jeronimo
Editor :Manuel Andrade
