Díli, Taibesi 19 de Marco 2026 – Vendedor sira iha Merkadu Taibesi, enfrenta difikuldade loroloron tamba fasilidade haris fatin ne’ebé avaria hela, situasaun ida ne’e hamosu preokupasaun bo’ot no afeta sira nia saúde no kondisaun bainhira fa’an.
Tuir negósiante abulante, Bento de Deus, hatete, fasilidade haris fatin ne’ebé disponivel iha merkadu Taibesi avaria hela no kondisaun la di’ak atu uza, situasaun ne’e la’ós deit halo deskonfortu ba vendedor sira, maibé afeta mós sira-nia servisu loron-loron.
Negósiante abulante, Bento de Deus hato’o nia preokupasaun ho fasilidade haris fati ne’ebé avaria foto Inacio
“Bainhira ami presiza atu uza haris fatin, obrigadu ami tenke uza komunidade sira nia haris fatin, ne’ebé presiza selu osan ho montante $ 0,50 centavus to’o $ 1, 50 centavus, ho kondisaun ida ne’e, ami sente aumenta tan ônusu ba ami,” Dehan negósiante abulante Bento de Deus iha merkadu Taibesi foin lalais ne’e.
Negósiante abulante informa katak fasilidade ne’e aat tinan barak ona, maski kompañia ida foin lalais atu mai hadia, maibé to’o agora seidauk remata no abandona hela, preokupasaun prinsipál ba vendedor sira mak kona-ba asesu bee no haris fatin, ne’ebé importante tebes atu suporta sira nia atividade loroloron.
Florinda de Deus, hanesan komunidade akresenta bainhira simu Jornalista Media Mudansa, foto Inacio da silva
Iha sorin seluk, Florinda de Deus, hanesan komunidade akresenta katak, los duni fasilidade haris fatin iha merkadu Taibesi avaria no kondisaun la aforavel, no vendedor sira tenki selu, bainhira uza haris fatin iha komunidade.
Enkuantu Xefe Suku Lahane Oriental, Trindade do Amaral Pinto Baptista, hateten katak nia mos halo hela observasaun ba problema ne’e durante tempu naruk ona, no konsidera katak jestaun fasilidade husi parte municipiu seidauk efisiente.
Xefe Suku Lahane Oriental, Trindade do Amaral Pinto Baptista, foto Inacio da Silva
“Uluk iha ona tentativa husi kompañia ida atu hadia, maibé problema sei nafatin iha. Ida ne’e hatudu katak sistema jestaun no kontrolu seidauk lao ho di’ak,” dehan Xefe Suku Lahane Oriental, Trindade do Amaral Pinto Baptista
Xefe suku hatutan katak utilizasaun fasilidade ne’ebé la ho kuidadu kontribui ba kondisaun ne’ebé aat. Tanba ne’e, husu atu iha kontrolu di’ak liu husi autoridade merkadu no mós konsiénsia husi utilizadór sira.
“ha’u sujere atu organiza vendedor sira ho di’ak liu, hodi labele halo merkadu sai nakonu liu no fo espasu ba konsumidór sira atu sosa ho konfortu”. Xefe suku informa
Relasiona ho preokupasaun ne’e xefe Jestor Merkadu Taibesi, Aníbal de Jesus, hateten katak fasilidade haris fatin iha merkadu refere agora dadaun estragus total, no situasaun ida ne’e fó impaktu boot ba vendedor no komprador sira hotu.
Xefe Jestor Merkadu Taibesi, Aníbal de Jesus, foto Temotio da Costa de Jesus
“Parte jestaun halo ona karta ba superior sira hodi husu reabilitasaun iha tempu tuir mai. Maski governu halo ona fasilidade foun antes, maibé problema mosu tanba utilizasaun ne’ebé la ho konsiénsia husi ema balun, no mós falta kontrolu no seguransa ba fatin ne’e”. Xefe Jestor Merkadu Taibesi hakotu.
Entretantu Xefe Jestor Merkadu Taibesi, husu mós ba goverenu la’ós deit halo reabilitasaun, maibé presiza mós tau matan no asegura mekanizmu seguransa ida, atu fasilidade haris fatin bele uza ho di’ak no sustentável ba vendedor no komprador sira hotu.
Jornalista : Ana Maria da Silva/Inacio Silva da Consenção
Editor :Francisco Pereira
