(Dili) Balide – Iha tempu ne’ebé teknolójia sai parte importante iha moris loroloron, inisiativa ida husi joven Timor oan lori mudansa foun ba setór edukasaun. Hahu husi mehi ki’ik iha Lospalos, agora nia realiza ona liu husi plataforma online ida ho naran www.kursutimor.com, ne’ebé fó oportunidade aprende ba ema hotu-hotu iha Timor-Leste.
Tuir CEO Kursu Timor, Victor Monteiro hatete, ideia ne’e mosu iha tinan 2021, bainhira nia hela iha Indonezia hodi tuir estudu lisensiatura. Iha momentu ne’ebá, nia la hanoin atu loke sentru treinamentu hanesan aula konvensional, maibé hakarak kria plataforma ida ne’ebé bele liga edukasaun ho teknolójia, atu estudante sira bele aprende iha ne’ebé deit no iha oras ne’ebé deit.
CEO Kursu Timor, Victor Monteiro dada lia ho Host Juliana Pacheco, imajen Zeferino da Silva
“Uluk ha’u sei ki’ik iha Lospalos hakarak aprende, maibé oportunidade limitadu. Agora hau hakarak ema seluk la presiza sente hanesan ha’u senti uluk,” Dehan CEO Kursu Timor, Victor Monteiro ho laran hakmatek, iha estudiu Média Mudansa foin lalais ne’e.
Victor informa katak, kursu Timor fornese kursu sira hanesan Accounting, Inglês no IT. Aula sira prodús husi ekipa lokal iha Dili, no maioria instrutór mak Timor oan ne’ebé remata estudu iha rai-laran no rai-liur. Plataforma ne’e permite estudante sira rejistu online, halo pagamentu liu husi banku ka e-money, no aprende tuir sira nia tempu rasik no la iha oráriu fiksu.
“Diferente ho kursu online sira ne’ebé uza Zoom ka Google Meeting, Kursu Timor kria sistema website rasik ne’ebé estudante sira bele asesu diretamente. Nune’e, sira bele fila fali aula bainhira deit atu kompriende di’ak liu”. Dehan nia.
Nia informa maski hasoru desafiu internet iha munisipiu sira, maibe nia kontinua optimista katak mudansa la bele akontese iha loron ida deit, maibé presiza hahú husi agora. Interese husi estudante sira iha área rural hanesan Soibada sai prova katak nesesidade atu aprende online boot duni.
“Kursu Timor la’ós atu troka eskola ka universidade, maibé atu kompleta. Kuandu estudante aprende teoria iha sala aula, sira bele aprofunda tan liu iha uma liu husi plataforma digital ne’e”. nia haktuir.
Nia hatutan objetivu boot husi inisiativa ida ne’e mak atu ajuda ema hetan abilidade (skill) atu hadia moris no kontribui ba sosiedade, tamba edukasaun mak xave atu muda moris no hamosu dezenvolvimentu ba nasaun.
“Se ita investe iha koñesimentu, ita investe ba futuru Timor-Leste,” nia hakotu.
Husi mehi ida iha loron uluk, agora Kursu Timor sai hanesan dalan foun ba juventude no sosiedade tomak atu aprende, dezenvolve an no prepara ba futuru ne’ebé di’ak liu ho telemóvel ka tablet iha liman no vontade atu aprende iha laran.
Jornalista : Francisco Pereira/ Jeorjina Maia
