Díli – Unidade Patrullamentu Marítima (sigla-UPM) konsege kaptura ro peska ilegál husi Indonézia ho naran KM Makmur Rejeki Mulya, durante operasaun patrullamentu iha tasi kosta sul, entre Beaço no Uatucarbau, iha tuku 18:00 OTL.
Operasaun ne’e realiza ho utilizasaun lancha rápida rua ho apoiu navio NRTL Lusitania, ho objetivu atu reforsa fiskalizasaun no proteje rekursu marítimu Timor-Leste nian.
Durante patrullamentu, ekipa UPM deteta ro refere ne’ebé hala’o atividade peska ilegál iha área tasi Timor. Iha ro laran, autoridade sira identifika tripulante hamutuk ema na’in 32.
UPM mós konsege konfiska ikan ho totál aprosimadamente 9 tonelada, inklui resin, rede arastu no ekipamentu seluk ne’ebé utiliza ba atividade ilegál refere.
Hafoin kaptura, tripulante sira no evidénsia hotu entrega ona ba Komandu Munisípiu Lautém hodi kontinua prosesu investigasaun no aksaun legál tuir lei ne’ebé vigora.
Agora daudauk, ro KM Makmur Rejeki Mulya hela iha Porto Com, Munisípiu Lautém, no sei submete ba prosedimentu legál tuir regra sira ne’ebé aplika.
Autoridade sira reafirma katak operasaun hanesan ne’e sei kontinua atu asegura proteksaun ba rekursu naturál no soberania marítima Timor-Leste.
Entretantu notísia kompletu ekipa Média Múdansa tenta halo konfirmasaun maibé sei iha prosesu nia laran.
Fontes : Neves Maca-ussa Taneti (UPM)
Ediror : Francisco Pereira
