(Bobonaro) Balibo Vila- Komunidade Balibo Vila la asesu ba bee-moos durante fulan rua tanba kanalizasaun bee-moos iha Postu Administrativu Balibo, Suku Balibo Vila tarde, tanba ne’e komunidade sira tenki sosa bee no tenki lao ain kilo 5 hodi ba kuru bee-moos atu konsumu no utiliza ba nesesidade sira seluk
Komunidade Maria dos Santos hatete, antes ne’e sira la buka bee-moos maske semana ida bee sai dala ida ka rua, maibé komesa halo kanalizasaun, bee-moos la iha ona, sira tenki sosa bee no lao ain kuaze kilo 5 hodi buka bee atu kuru.
“Antes kompañia Leohara halo kanalizasaun ba bee ne’e ami la buka bee, maske semana ida bee sai dala ida ka rua de’it, maibé agora ami tenki lao ain kilo 5 mak ba kuru bee-moos hodi uza ba han no uza ba nesesidade seluk”, dehankomunidade Maria dos Santos ba jornalista sira iha Balibo Vila, Segunda, 13/10/2025
Nune’e nia dehan, nia la sosa bee tanba la iha osan, nia sempre lao ain de’it hodi ba kuru bee.
“Durante bee la iha ne’e ha’u la sosa tanba osan la iha, ami lao ba buka bee iha aldeia seluk ne’ebé mak bee iha ne’e atu ami bele kuru hodi uza ba nesesidade loro-loron nian”, informa nia
Iha sorin seluk, Jeronimo Soares hanesan komunidade ne’ebé mak faan bee hatete, beene’e sira fa’an ba kuru iha aldeia Belola hodi fa’an fali ba komunidade sira ne’ebé mak la iha bee-moos
“Bee ne’ebé mak ami fa’an ne’e ba kuru iha aldeia Belola, ami fa’an perfil ida $12, iha komunidade balu ne’ebé osan la iha atu sosa bee ne’e ami ajuda sira fó gratuita de’it”, konta nia.
Nune’e Xefe Suku Balibo Vila, Manuel da Cruz esplika, komunidade sira iha Balibo Vila tenki lao sai fali ba aldeia seluk hodi kuru bee.
“Komunidade sira iha Balibo Vila tenki lao fali ba aldeia Aloka no Buileku hodi kuru bee-moos, sira ne’ebé mak iha transporte ne’e di’ak, maibé sira ne’ebé mak la iha transporte ne’e obrigado tenki lao ain kuza kilo 5 hodi ba kuru bee”, hakotu Xefe Suku, Manuel da Cruz iha nia kna’ar fatin sede suku Balibo
Xefe Suku ne’e informa, tuir akordu ne’ebé governu ho kompañia halo, kanalizasaun ne’e hahú iha fulan jullu no konklui iha fulan Setembru, maibé kanalizasaun ne’e seidauk hotu entaun estende tan ba fulan Outubru ne’e.
Autoridade Suku ne’e mós rekomenda ba parte kompetente atu orienta kompañia hodi aselera prosesu kanalizasaun ne’e, nune’e bele fasilita komunidade sira.
Tuir Observasaun jornalista Média Mudansa iha terenu nota katak, los duni komunidade sira ne’ebé mak hela iha Balibo Vila la asesu ba bee-moos.
Jornalista: Sandi Belo
Editora: Quisânia Gleide
