(ERMERA), Mudansa– Kordenadora Negosiu haki’ak Manu Lokál iha munispíu Ermera, Ediana Pinto Oliveira, hala’o negosiu haki’ak Manu Lokál konsege poupa osan dolares amerikanu $ 1000, nomós loke ona kampu traballu ba Timoroan hamutuk na’in ha’at.
Mundu sukat ema ho sasukat diferende, ema ne’ebé lais deskobre uluk sasukat ne’e bele mós sai motivasaun hodi hodi hafutar moris ne’e ho dignu.
Metafora ne’e refleta duni ba Ediana Pinto Oliveira, iha 2017 nia sei iha banku sekundariu iha Dili, ba nia difisíl tebes atu iha osan. Nia deside fila ba knua, ho esperansa bo’ot atu hetan doit ruma hosi inan-aman. Resposta ne’ebé nia simu negativu ba ninia husu, ho dezesperdu nia deside fa’an nia manu inan ho oan hamutuk sia ho objetivu atu subrevive iha Dili hodi kontinua nia estudu.
Hakfodak nia simu telfone, husi nia inan-aman katak, manu restu ne’ebé nia iha nia knua sai ona hahan ba busa fuik. Sente triste, maibé iha momentu hanesan sai mós motivasaun ba nia atu hahu hakiak manu lokál hafoin remata estudu.
Ho difikuldade no oinsa manu lokál nia folin sai resposta ba nia nesesidade estimula nia enerjia no motiva nia atu hahu hakiak manu lokál. Bainhira nia hahu haki’ak, suporta hosi família enkoraza nia atu alarga nia negosiu ne’e. Desizaun ne’ebé nia foti hahu salva nia hosi dependensia ba ema seluk.
“negosiu ne’e hahu la’o, esperensia motiva alarga hakiak manu Timor to’o ohin loron poupa ona osan hamutuk $1000 no loke ona kampu servisu ba Timoroan hamutuk ema na’in haat servisu ha’u nia fatin,” Konta husi Kordenadora Negosiu Manu Lokál Ermera, Ediana Pinto Oliveira ba Jornalista Mudansa via WhatsApp, sabadu, (11/06/22) .
Kordenadora ne’e afirma, iha prosesu hakiak manu lokál ne’e la fasíl no liu husi prosesu naruk, hanesan manu inan tolun tiha, hafoin sei lu’ut no fera nia tolun hafoin mak haki’ak sai bo’ot hafoin ba fa’an, inklui mós prosesu ba manu nia hahan sei utiliza manuál, hanesan fai no tuku de’it laiha makina ida ne’ebé mak bele prodúz, sai difikuldade bo’ot ba nia negosiu,”nia espresa.
Ediana deklara, durante ne’e sira nia area kobertura fa’an manu iha de’it Ermera laran hanesan, suku Samalete, maibé nia iha planu oin mai sei supply ba loja sira iha kapitál Dili nune’e bele hamenus importasaun manu (ayam potong) husi nasaun estranjeiru.
“Ha’u sei halo investimentu ba manu nia luhan, inklui mós halo parseiru ho super-market sira iha Dili laran no mós halo tan produtu manu moris sai na’an manu Timor, hodi bele oferse ba merenda eskolar no restaurante sira iha munisípiu to’o nasionál,” dehan nia
Meius fa’an ne’ebé mak durante ne’e utiliza mak liu husi media online sira hanesan whatshap, facebook, no sira seluk tan, inklui mós halo promósaun iha komunidade sira.
“Dadaun grupu ne’e atinji ona osan dolares amerikanu $ 1000 resin mak iha konta bankaria, maibe balun mak sira investe ona ba nesesidade negosiu nian hanesan hadia manu nia luhan no sosa manu nia hahan”tenik nia.
Negosiadora ne’e hato’o mensajen katak, nu’udar negosiante dahuluk tenki Fiar an, ema bisnes nain labele ta’uk, karik monu nafatin hader no la’o nafatin. Ida ne’e mak prinsipiu ema bisnis, labele tauk atu Investe inklui lalika laran susar ho lukru ne’ebé ki’ik, husi ki’ik la’o ho neneik no halo bebeik sei sai bo’ot ho kreativu no badinas ne’ebé maka iha.
Jornalista :Manuel Andrade
Editór :Felisberto Fernandes da Costa