(OE-CUSSE) Baki-Diretora Eskola Ensinu Sekundária Jerál Baki (ESGB) hamutuk ho profesor no estudante sira selebra loron aniversáriu nasionál FALINTIL, ba dala 50 hodi hanoin fila fali heroi sira nia luta ba libertasaun.
Diretora Eskola ESGB, Chrishdarieante Rampi Anuno, hatete, Eskola Ensinu Sekundária Jerál Baki selebra loron FALINTIL ba dala-50 hodi hanoin fila fali heroi sira ne’ebé luta ba ukun rasik an.
“Ohin ita selebra loron FALINTIL nian ba dala-50 no mós loron ida ne’ebé importante tebes ba ita atu hanoin fila fali heroi sira ne’ebé hasoru funu iha ai-laran, no ita tenke fó parabéns ba sira tanba ita hetan liberdade iha tempu agora, ho nune’e importante liu ba estudante sira no professor sira atu hala’o sira nia kna’ar, hanesan fó motivasaun no komportamentu di’ak ba estudante sira atu kontribui iha nasaun Timor-Leste, atu nune’e prepara ba sira nia futuru aban bainrua nian”, hateten, Diretora Eskola (ESGB) Chrishdarieante Rampi Anuno, ba jornalista Média Mudansa, Kuarta 20/08/2025.
Diretora ne’e hatutan, atividade sira eskola refere hala’o mak hanesan; Icar Bandeira ho Hino Nasionál no Drum Band, atividade sira ne’e kada tinan eskola sempre hala’o hodi komemora loron importante sira.
“Maibe eskola ida ne’e la’os ohin mak foin hala’o atividade hanesan ne’e, eskola ida ne’e tinan-tinan sempre hala’o atividade sira hanesan ne’e hodi komemora loron importante sira hanesan 20 de maio, 28 de novembero no 30 de Agostu, sempre hala’o iha eskola ida ne’e, maske loron restaurasaun realiza iha Oe-cusse vila maibé eskola ida ne’e nafatin hala’o iha ne’e”, dehan nia.
Diretora ne’e mós husu ba joven no estudante sira kuandu iha mehi di’ak ida hakarak atu halo buat ruma ba iha nasaun ne’e tenke realiza iha imi nia futuru, no liu-liu asesu ba iha parte edukasaun tanba imi mak futuru nasaun nian.
Entretantu iha selebrasaun aniversáriu loron FALINTIL ne’e mós hetan partisipasaun masimu husi estudante ho professor sira, estudante estajiariu husi Universidade Nasionál Timor-Lorosa’e (UNTL) no komunidade sira.
Jornalista: Rogerio Anuno
Editora: Sandi Belo
