(Díli) Maskariñas– Negosiante Celestina Kareon ho idade rua-nulu resin ne’en (26), mai husi Munisípiu Likisá, Postu Administrativu Maubara, Suku Maubara Lisa, hanesan ema difisiénte matan la sai bareira ba nia atu hala’o nia negosiu ki’ik iha dalan ninin hodi responde ba nesesidade uma laran
Defisiénsia matan la sai bareira ba ha’u atu halo negosiu ki’ik balun hodi susténsia moris loron-loron, ida ne’e hatudu katak ema ho defisiénsia matan mós bele halo negosiu no hetan independénsia ekonomia, negosiu ida ne’e ha’u hahú halo negosiu ho osan dolares amerikanus ($150) iha inisiativa rasik atu halo negosiu, tanba ha’u lakoi depende ba ema seluk, maibé prefere esforsu a’an hodi bele sustenta moris rasik”, dehan Celestina Kareon, ba Jornalista Média Mudansa iha Maskariñas, 23/06/2025
Nia deklara, hanesan ema defisiénsia matan no forma ona uma kain, maski iha kondisaun ne’ebé la hanesan ho ema seluk, maibé nia nafatin kontinua hodi halo negosiu ki’ik ida ne’e atu bele sustenta nia moris loron-loron nian.
“Kada loron desafiu ne’ebé hau hasoru tanba ema ladun sosa buat ne’ebé ha’u fa’an, maibé ho pasénsia no fuan bo’ot, nafatin fa’an, tanba ha’u lakoi depende ba ema seluk, dalaruma ha’u hetan rendimentu ho dólar amerikanus sanulu resin lima ($15), dalaruma la hetan, maibé ami nafatin iha interese hodi fa’an bele fó susténsia ba ami, liu husi negosiu ki’ik ida ne’e mak ami bele moris mesak no la depende ba família”, dehan Celestina.
Celestina relata, negosiu ne’ebé nia halo mak kompleta parte importante ba nia nesesidade loron-loron nian, hanesan selu kos, no sasán sira ne’ebé sustenta ba moris.
“Hau halo negosiu ne’e tinan ida no atu ba fulan sanulu nia laran hahú, ami la simu suportasaun husi ema, ami uza de’it osan rasik atu hola sasan báziku hodi fa’an iha dalan ninin, no tuir mai mak United Nations Children’s Fund (UNICEF sigla inglês) suporta ho osan dólar atus ha’at lima-nulu ($450), ne’ebé ha’u uza atu tau ba ha’u nia nesesidade sira no hanoin atu aumenta tan produtu sira para hodi fa’an”,nia klarifika
Ertertantu Negosiante Celestina Kareon rekomendasaun ba joven sira tantu difisiénsia no la difisiénsia, labele moe ba moris, tenki buka moris atu sustenta mortis nian, hanesan defisiénsia, la bele sadere ho hanoin katak família bele halo buat hotu, tanba família la tau prioridade, tamba ne’e tenki buka moris hodi sustenta nesesidade loron-loron nian.
Jornalista: Inácio Silva/Estagiada, Maia Luanda
Editora: Gaudencia Belo
