(Díli) Largo de Lecidere 05/06/ 2026 – loron mundial oceanu halibur estudante, juventude, organizasaun sosiál no komunidade sira partisipa iha atividade Caravana Oceanu iha Cidade Díli hodi komemora Loron Mundial Oceanu 2026 no hasa’e konsiénsia públiku kona-ba importánsia proteje tasi no ambiente ba sustentabilidade jerasaun ohin no ba futuru. Atividade ne’e hala’o ho objetivu atu sensibiliza komunidade sira kona-ba nesesidade preserva oceanu husi poluisaun no destruisaun ambientál.
Tuir Partisipante Mariana da Costa, hato’o katak sente kontente bele partisipa iha Caravana Oceanu ne’e tanba atividade refere promove importánsia tasi iha rai-doben Timor-Leste nian. no nu’udar sidadaun Timor-Leste ema hotu-hotu iha responsabilidade atu proteje tasi tanba oceanu kontribui bo’ot ba moris no dezenvolvimentu nasaun nian.
“Timor-Leste rodeadu husi tasi no iha rekursu barak hanesan peskas, turizmu no rekursu naturál sira seluk. Tasi fó benefísiu barak ba ita, tan ne’e ita tenki jere no utiliza rekursu hirak ne’e ho di’ak,” dehan Mariana iha selebrasaun loron Mundial Oceanu iha Largo lecidere, sexta 05/06/2026.
Nia mós apela ba públiku atu kuida ambiente no evita soe lixu arbiru ba tasi no fatin públiku sira. Tuir nia, ambiente ne’ebé mos no saudável sei fó benefísiu ba komunidade agora no ba jerasaun sira iha futuru.
Iha sorin seluk, estudante segundaria Escola Santa Madalena de Canossa Auxilio de Deus, haforsa senti kontente tebes tanba ida ne’e mak dala uluk sira partisipa no aprezenta performance dansa no baku drum-band representa husi eskola iha selebrasaun loron mundial oceanu.
Nia relata, la’ós de’it ambiente iha rai maran mak presiza kuidadu, maibé ambiente tasi nian mós importante tebes. Nune’e nia haktuir, problema lixu sei sai desafiu bo’ot ida ba preservasaun ambiente marinu/tasi no presiza iha inovasaun atu reutiliza lixu sira ne’ebé bele transforma sai produtu útil.
“Liuhusi atividade ida ne’e, ami hakarak enkoraja komunidade atu labele soe lixu arbiru, maibé buka dalan atu reutiliza no transforma lixu sira sai produtu útil ne’ebé bele uza fila-fali,” nia rekomenda
Enkuantu iha ambito selebrasaun loron mundial oceanu lao’s deit selebra iha kapital Díli maibe iha mos munisipiu sanulu resin rua (12) inklui rejiaun administrative espesial oe-cussse ambeno (RAEOA), hafoin partisipa iha Caravana Oceanu Governu lideradu husi prezidente da Repúblika (PR )no Primeiru ministru (PM) inklui mos entidade no Governantes sira lao ain husi edifisiu Ministerio Negosiu Estrajeiru (MNEK) farol to’o iha largo Lecidere no akompaña maximu husi komunidade Munisipiu Díli ho atividade caravana,atrasaun dansa no drumb band.
Jornalista/Estajiada: Riana Silva/Sandra
Editor :Ana Maria
