(Díli )Largo lecidere 27/05/2026— Unidade Polísia Marítima (UPM) husi PNTL ohin selebra aniversáriu ba dala 23 ho atmosfera simples maibé cheia ho espírito patriotiku no komitmentu atu kontinua proteje soberania marítima Timor-Leste.
Iha serimónia ne’e, membru Governu, deputadu, korpu diplomátiku, parseiru internasionál no nasional, ofisiál superior no membru PNTL sira marka prezensa hodi fó apoiu no apresiasaun ba servisu ne’ebé UPM halo durante tinan barak liu ona.
Komandante Jerál PNTL, Komisáriu Assistente Polísia Afonso dos Santos, iha nia diskursu hatete katak durante tinan 23, UPM kontribui boot ba defesa soberania nasional liu husi proteksaun ba área marítima no garantia seguransa iha tasi Timor-Leste.
“Ho orgulho bo’ot ohin loron ita hotu selebra aniversáriu UPM ba dala 23. Durante tinan 23 nia laran, UPM desempenha papel importante ba defesa soberania nasional no garantia seguransa marítima Timor-Leste,” hatete Komisáriu Assistente Polísia Afonso dos Santos iha Largo Lecidere 27/05/2026.
Nia esplika katak UPM hanesan unidade espesializadu ida husi PNTL ne’ebé responsabiliza ba vigilánsia, patrullamentu, intersesaun no fiskalizasaun iha área kosteira no domíniu marítimu.
Hanoin katak Timor-Leste nu’udar nasaun ilha ida, nia dehan tasi sai riqueza importante tebes ba povu no Estadu, tanba ne’e seguransa marítima tenke sai prioridade nasional.
“UPM kontinua kombate peska ilegal, kontrabandu, imigrasaun ilegal no ameasa transnasionál sira seluk,” nia akresenta.
Durante tinan 2025, UPM konsege realiza patrulla marítima hamutuk 244 no patrulla terrestre 2.499. Unidade ne’e mos regista detensaun hamutuk 30 relasiona ho kazu kontrabandu no apreensaun ba sasán ilegal sira hanesan tabaku no bebidas.
La’ós deit iha área seguransa, UPM mos hatudu nia prontidaun iha operasaun salvamentu. Dadus hatudu katak ema nain 11 konsege hetan salvamentu iha tasi durante períodu ida ne’e.
Komandante Unidade Polísia Marítima, Superintendente Xefe Polísia Eugénio Pereira, hato’o apresiasaun ba membru hotu tanba dedikasaun no disiplina ne’ebé sira hatudu iha servisu loroloron.
“Servisu iha tasi eziji korajen, espírito misaun no sentido responsabilidade ne’ebé aas. Hau expresa hau nia gratidaun ba membru hotu ne’ebé kontribui ona ba unidade ida ne’e,” dehan Eugénio Pereira.
Nia mos agradese ba apoiu husi IX Governu Konstitusionál no parseiru internasionál sira ne’ebé ajuda iha área formasaun, kapasitasaun teknika no fornesimentu ekipamentu.
Iha fatin hanesan, Komandante Komponente Naval F-FDTL, Higino Das Neves, hato’o nia apresiasaun ba progresu ne’ebé UPM atinji to’o agora no reafirma importánsia kooperasaun entre instituisaun sira.
“Ha’u fó parabéns ba UPM tanba progresu ne’ebé di’ak tebes no fiar katak iha futuru ita sei kontinua servisu hamutuk ho di’ak liu tan,” hatete Higino Das Neves.
Nia mos revela katak atualmente UPM kontinua servisu hamutuk ho Komponente Naval hodi halo patrullamentu konjuntu no kombate peska ilegal iha área marítima Timor-Leste.
Serimónia aniversáriu ne’e la’ós deit sai momentu selebrasaun, maibé mos oportunidade atu reafirma komitmentu UPM hodi kontinua servi povu no nasaun ho lealdade, profesionalizmu no espírito patriotiku.
Jornalista /Estajida Caryn Camões.
Editor : Ana Maria da Silva
