(DILI), Jardim 5 de Maiu, 22/05/2026 — União Estudante Universitáriu Munisípiu Viqueque (UEUMV), ohin realiza komunikadu imprensa ida iha Jardim 5 de Maio, Dili, hodi hato’o preokupasaun kona-ba kondisaun infraestrutura, edukasaun no saúde iha Munisípiu Viqueque.
Iha oportunidade ne’e, porta-vóz UEUMV, Apolinário da Silva, hatete katak organizasaun ne’e servisu voluntariamente hodi sai hanesan lian ba komunidade Viqueque nian, liu-liu kona-ba problema sosiál sira ne’ebé komunidade enfrenta loron-loron iha munisípiu refere.
“Ho razaun fundamentál hirak ne’e mak ohin ami mai iha ne’e hodi husu ba parte relevante sira, hanesan Ministériu Obras Públikas (MOP), atu fó atensaun ba problema sira ne’ebé komunidade sir enfrenta,” dehan Apolinário da Silva iha Jardim 5 de Maio.
Iha fatin hanesan, Nelson Manuel Ximenes hatutan katak, maske Viqueque fó kontribuisaun bo’ot iha luta ba independénsia Timor-Leste, komunidade seida’uk senti mudansa bo’ot iha moris loron-loron.
Imajen: Ana
“Povu Viqueque seida’uk senti ukun-an tanba parte relevante sira ladún halo fiskalizasaun no atensaun ba komunidade,” afirma nia.
Iha parte seluk, reprezentante UEUMV, António Gomes, dehan katak organizasaun ne’e konsidera an hanesan “fuan, ibun no kakutak” ba povu Viqueque, liu-liu inan-aman, labarik no joven sira, atu lori sira-nia aspirasaun ba nível nasionál.
“Liu husi komunikadu ida ne’e, ami sei fokus liu ba infraestrutura, edukasaun no saúde tanba ami haree katak situasaun iha Viqueque grave tebes, liu-liu iha área edukasaun no saúde,” dehan António Gomes.
António Gomes hatutan tan katak kondisaun estrada no ponte sira ne’ebé aat halo komunidade enfrenta difikuldade bo’ot iha transporte, inklui asesu ba servisu saúde no edukasaun.
“Kondisaun ne’e halo susar atu lori pasiente sira ba fatin saúde no estudante sira atu tuir aula ho di’ak. Karik la hetan solusaun lalais, sei difísil atu garante servisu edukasaun no saúde ne’ebé di’ak ba komunidade,” hatete nia.
UEUMV husu ba Governu no parte relevante sira atu tau atensaun sériu ba dezafiu sira ne’ebé komunidade Viqueque enfrenta, liu-liu iha asesu ba saúde, kondisaun eskola no infraestrutura bázika.
Komunikadu imprensa ne’e remata ho apelu ida ba parte hotu-hotu atu servisu hamutuk hodi promove dezenvolvimentu sustentável no bem-estar ba povu Viqueque. UEUMV mós afirma katak sira prontu atu halo diálogu ho parte relevante sira bainhira problema hirak ne’e seida’uk hetan solusaun.
Jornalista /Estajiária : Caryn Camões
Editor :Ana Maria da Silva
