Dilí, Caicoli 11 Maiu 2026 — Momentu emosional no orgullu marka loron graduasaun ba Pedro Mouzinho, estudante ida ne’ebé ofisialmente remata nia estudu iha centru convensoens de Dili (CCD-Dili) ho grau Bachelor of Business (B.Bus) iha área Turismo no Hospitalidade, liu husi departamentu Hospitality Management Universidade Dili Institute of Technology (DIT).
Susesu ida ne’e la’ós deit kona-ba asesu akademiku, maibé mos representa viajen luta no perseveransa durante tempu estudu. Durante tinan balun iha kapital, Pedro hasoru dezafiu oioin, hanesan limitasaun ekonomia, adaptasaun ba moris estudante, no presiza mantein rezultadu akademiku atu bele kontinua nia edukasaun. Maski nune’e, ho vontade forte no apoiu husi família, nia konsege remata nia estudu ho di’ak.
Pedro agora dadaun hela iha área Markoni 04, Dili, no nia mai husi Munisípiu Aileu, Postu Administrativu Aileu Vila, Suku Aileu Vila, Aldeia Taratihi. Ba nia, edukasaun mak dalan importante atu muda moris no loke oportunidade ba futuru.
“Ha’u sente kontente tebes tanba bele to’o iha etapa ida ne’e. Ida ne’e sai motivasaun atu ha’u kontinua dezenvolve ha’u-nia kapasidade iha futuru,” Pedro dehan ba Mídia Mudansa.
Graduasaun Pedro nian mos fó impaktu pozitivu ba komunidade iha Aileu. Barak haree susesu ida ne’e hanesan prova katak juventude husi área rural mos bele hetan oportunidade atu asesu edukasaun superior no atinji susesu.
Domingos Vidigal hanesan aman husi Graduadu Pedro hatete,graduasaun hanesan ne’e importante tebes ba família sira ne’ebé durante ne’e halo sakrifísiu atu sustenta oan sira nia estudu.
“Loron ohin loron ida ne’ebé especial tebes ba inan-aman sira. Ami sente orgulho tanba oan sira konsege remata estudu maski hasoru dezafiu oioin,” nia hatutan.
Nia mos esplika katak maioria inan-aman sira enfrenta difikuldade ekonomia durante tempu estudu, maibé kontinua esforça-an atu fó apoiu ba oan sira nia futuru.
“Maske ita la hatene le’e no hakerek, ita hakarak oan sira bele sai ema lisensiadu. Tanba ne’e, ita tenki forte no halo sakrifísiu atu sustenta sira nia estudu,” Domingos akresenta.
Iha tempu hanesan, nia mos fó mensajen ba inan-aman no juventude sira atu kontinua valoriza edukasaun, tanba edukasaun importante atu prepara juventude sira compete iha era globalizasaun no ASEAN.
Área Turismo no Hospitality ne’ebé Pedro estuda konsidera hanesan setor estratéjiku ida ba dezenvolvimentu Timor-Leste. Setor ne’e iha potensial bo’ot atu promove turizmu nasional, kria oportunidade servisu ba juventude, no kontribui ba kresimentu ekonomia nasaun.
Jornalista/ Estajida :Caryn Sandra
Editor :Ana Maria Da Silva
