(Dili), Lecidere, 23/05/2026 – Korpu Eskuteiru Katólika Timor-Leste, CEC-TL, realiza kongresu Asembleia Nasional ida iha Dili ho objetivu atu halibur membru sira husi diocese rua, inklui Diocese Dili no Diocese Maliana, hodi hili estrutura nasional ida atu fortalece organizasaun ba futuru.
Kordenador Jeral Altok Nasional ba Diocese Rua no Arquio Diocese Dili, Lucioano dos Santos Lopes, hatete katak kongresu ne’e importante atu hametin unidade no organiza servisu regional tolu ne’ebé estabelese ona.
“Objetivu prinsipal ba Asembleia Nasional nian mak oinsa halibur membru sira hotu CEC-TL nian husi Diocese rua hodi eleze estrutura nasional ida, nune’e bele ajuda no apoiu servisu estrutura regional sira,” hatete Lucioano dos Santos iha Lecidere 34/06/2026
Nia mos esplika katak estrutura nasional ne’e sei prepara eventu boot ida hanesan Jambore Nasional iha Lifau, Oecusse, atu komemora tinan 50 ezisténsia eskutismu katólika iha Timor-Leste.
Nia mos esklarese CEC-TL iha historia naruk desde tama iha Timor-Leste iha tinan 1971 iha Lifau, Oecusse, no organizasaun ne’e hala’o tuir estatutu no prinsipiu rasik atu orienta membru sira hotu.
“CEC-TL konsidera hanesan momentu ikliziástiku ida, la’os deit grupu partikular ida. Estatutu mak sai baze legal atu orienta membru no agrupamentu sira hotu,” dehan nia.
Luciano husu ba joven timoroan sira atu kontinua envolve an iha atividades eskuteiru atu bele forma lideransa di’ak ba Igreja no nasaun.
“Formasaun karakter espiritual importante tebes atu bele forma lider sira ne’ebé di’ak hodi servi uma kreda no nasaun,” nia afirma.
Iha fatin hanesan, Padre Lucio Norberto Dedeus husi Diocese Maliana hatete katak kongresu ne’e lori esperansa foun ba Igreja no nasaun.
“Atividade kongresu ohin ne’e importante tebes tamba halibur fila fali eskutismu sira no fo esperansa ba Igreja no nasaun,” hatete Padre Lucio.
Nia mos lembra katak eskutismu iha papel boot iha formasaun karakter ema no juventude, maske durante tempu naruk hasoru difikuldade barak.
Iha diskursu seluk, Xefe Casa Sivil Prezidente Repúblika, Henriqueta da Silva, hatete independénsia deit la sufisiente atu harii nasaun ida forte.
“Ita hetan ona liberdade, maibe liberdade deit la konstrutivu. Ita presiza sidadaun responsável atu hamosu nasaun ida ne’ebé di’ak,” dehan Henriqueta.
Nia mos destaka importánsia integridade no formasaun karakter iha konstrusaun nasional.
Kongresu Asembleia Nasional CEC-TL ne’e hein atu produz estrutura nasional ida ne’ebé forte no bele kontinua forma juventude timoroan sira sai lider ne’ebé iha espiritu servisu, fiar no responsabilidade ba Igreja no nasaun.
Jornalista/ Estajida: Caryn
Editor: Ana Maria da Silva
