Baucau, Bahú– Bazeia ba avaliasaun desentralizasaun ikus, Munisípiu Baucau konsege atinji kategoria A, hamutuk ho munisipiu lima seluk, ho indikasaun progresu pozitivu iha kapasidade administrativu no implementasaun servisu públiku, desentralizasaun iha Timor-Leste kontinua hatudu progresu pozitivu.
Tuir Bispo Dioseze Baucau, Dom Leandro Maria Alves hatete, Rezultadu ida ne’e hatudu katak Baucau iha ona kapasidade atu asumi responsabilidade no hala’o nia an rasik iha prosesu dezenvolvimentu lokal. Desentralizasaun rasik sai importante tanba fo poder ba nivel munisipal atu halo desizaun no jere rekursu tuir nesesidade komunidade.
“Iha Baucau, partisipasaun povu no juventude mós hatudu aumentu. Komnidade sira hamutuk atu uza rekursu ne’ebé iha, inklui rekursu naturais no matenek lokal, hodi suporta dezenvolvimentu iha area sira”, dehan Bispo Dioseze Baucau Dom Leandro Maria Alves iha suco Bahú, 10/04/2026.
Dom Leandro Maria Alves, esplika Governu sentral mós kontinua hatudu konfiansa ba munisipiu sira, inklui Baucau. Tanba ne’e, autoridade lokal presiza hala’o sira nia knaar ho responsabilidade no transparénsia, atu asegura rekursu sira uza ho diak.
“Tuir avaliasaun governu, infrastrutura báziku iha munisipiu sira komesa ona prenxe padraun nesesáriu sira, ida ne’e konsidera hanesan etapa importante ida hodi prepara ba autonomia ne’ebé kompletu iha future” dehan Bispo Baucau.
Bispo Dioseze Baucau hatutan, maske nune’e, unidade entre komunidade sei sai fatór prinsipál atu garante susesu, ho kooperasaun no solidariedade, povu Baucau bele aproveita oportunidade sira atu hasa’e moris diak ba ema hotu, nune’e husu ba sosiedade atu kontinua apoiu programa no inisiativa ne’ebé fo benefísiu ba komunidade tomak.
Jornalista : Madelena de Lima
Editor : Francisco Pereira
