(Dilí, 19/02/2026) Balide- Problema fu’uk monu ne’ebé durante tinan tolu lori preokupasaun ba Elisabet Soares, ikus mai sai pontu hahú atu nia kria negósiu ki’ik ida ho naran Rosse Merry Oil. Husi esperiénsia rasik no peskiza iha internet, nia deside prodús mina fu’uk alami/natural hodi ajuda ema sira seluk ne’ebé enfrenta problema hanesan.
Iha entrevista Elisabet hateten motivasaun ne’e mai husi nia a’an rasik, tanba durante tempu naruk nia rasik hasoru problema ne’e hanesan fu’uk monu, kaspa, fu’uk maran no toradu. Nia hatete depois buka informasaun liuhusi internet nia peskiza kona-ba ai-horis no produtu herbal/natural ne’ebe bele resolve fu’uk, nia nia hetan referénsia kona-ba rosse merry ne’ebé konsidera bele ajuda hadia fu’uk.
Elisabet esplika molok fa’an nia halo teste no uza wainhira hetan resultadu ne’ebe hafoin nia transforma sai ba negosiu to’o ohin loron,hafoin nia hetan konfiansa atu komesa fa’an produtu refere no promóve liu-husi média sosial tik-tok.
“Ha’u uluk tauk atu posting iha TikTok, tauk ema la gosta ka la hola. Maibé depois ha’u koko posting duni, ema sira komesa order, husi ne’ebé mak ha’u kontinua to’o agora, no ema barak mak sosa ha’u nia produtu rosmerry oil” nia hatete his studio Media Mudansa (MD) Balide, Díli foin lalais ne’e
Nia esplika produtu ne’e la uza rosse merry de’it, maibé mistura ho ingrédiente sira seluk hanesan mina nu’u virjen, mina kami, ai-chenke, ailia, hibiscus, ginsen no marungi. Prosesu produsaun la halo liuhusi pemanas direitu, maibé liuhusi métodu infusaun ho tempu naruk entre semana rua to’o fulan ida, atu ingrédiente sira absorve di’ak iha mina.
Elisabet promóve produtu liuhusi média sosial hanesan TikTok, WhatsApp no Facebook. Husi negósiu ne’e, nia bele hetan rendimentu lor-loron entre dolares amerikanu lima nulu $50 to’o dolares amerikanu walu nulu $80, no iha tempu balun bele to’o dolares amerikanu atus ida rua nulu $120. Hafoin Osan ne’ebé nia hetan seidauk uza ba halo buat seluk, maibé rai nia koko atu sosa makina hodi aumenta produsaun.
Maski nune’e, Elisabet hatete katak dezafiu boot mak limitasaun produsaun, tanba parte ingrédiente sira prodús manual, liuliu mina nu’u no mina kami ne’ebé halo iha área Viqueque.
Nia fó mensajen katak feto sira la presiza de’it hela iha uma, maibé iha kapasidade atu kontribui ba ekonomia família no nasaun liuhusi negósiu ki’ik sira.
“Elisabet hatete katak buat importante mak la bele ta’uk hahú. Agora média sosial bele sai dalan di’ak atu promove produtu no buka moris di’ak liu,” nia hakotu.
Jornalista : Jhenny Maya/ Francisco Pereira
Editor : Joenaca da Conceção
