(Lautém)- Prezedente Autoridade Munisípiu Lautém (PAM) Selebra Loron Semana Mundiál Oseanu 2025 hodi Eduka no hasa’e Konsiensia Komunidade sira nian atu labele so’e foer arbiru nune’e bele proteje no konserva Biodiversidade sira ne’ebé moris iha Tasi, iha Illa Jaco (Totina) iha Postu Administrativu Tutuala, Munisípiu Lautém.
Iha intervensaun Prezidente Autoridade Munisipál Lautém (PAM), Mélio de Jesus, hateten, mai iha Tasi-Ibun Illa Jaco, atu hala’o atividade limpeza ba Loron Mundiál Oseanu nian ba loron da Hitu (7), ne’ebé kontinuasaun ba abertura semana mundiál l oseanu iha loron 1 Juñu ne’ebé hala’o iha Tasi-Ibun Iradarate Postu Iliomar no iha loron 3 Juñu iha Tasi-Ibun Lori Postu Lore, iha loron 4 Workshop nasionál kona-ba poluisaun Marina Plástiku iha GOR Lospalos Vila, iha loron 5 Juñu hala’o limpeza iha Tasi-Ibun Com no loron ikus limpeza Tasi-Ibun iha Illa Jacobs.
“Atividade Loron Mundiál Oseanu ne’ebé Governu deside hodi selebra durante semana ida hahú 01 até 08 Juñu ne’e ho tema mak “Ha’u Nia Tasi, Ha’u Nia Timor”, ho objetivu atu kuidadu ita-nia Tasi, liuliu Tasi-Ibun sira tenke mós husi lixu, atu nune’e bele konserva no prezerva Biodiversidade sira ne’ebé moris iha tasi laran, ne’ebé nu’udar Ekonómia sustentavel ba iha Ekonómia Azul”, dehan PAM foin lalais ne’e
Iha fatin hanesan Sekretário Estadu Florestas (SEF) Fernandino Vieira da Costa hatutan, komemorasaun Loron Semana Mundiál Oseanu ne’e loron ne’ebé importante oinsa atu eduka no hasa’e konsiensia Timor oan tomak atu labele soe foer arbiru nune’e bele Proteje no Konserva Biodiversidade sira ne’ebé moris iha Tasi laran.
“Governu liu husi Gabinete Primeiru-Ministru Frontéira Maritima ho Ministériu Turizmu no Ambiente,Ministériu Agrikultura, Pekuária, Peska no Florestas(MAPPF) no Prezidente Autoridade Munisípiu sira servisu hamutuk komemora Loron Semana Mundiál Oseanu, ne’e atu hasae konsiensia komunidade sira nian hodi tau matan ba ita nia Tasi, ho nune’e mak tema ba komemorasaun Loron Semana Munduál Oseanu tinan ida ne’e “Hau nia Tasi, Hau nia Timor”, dehan SEF.
SEF hatutan tan, objetivu husi loron Mundiál ne’e atu hasa’e konsiensia komunidade sira nian hodi proteje no konserva biodiversidade liu-liu ikan sira ne’ebé moris iha Tasi. Illa Jaco fatin ne’ebé uniku no diferente ba Illa sira seluk, tanba ne’e tenke kuidadu. Illa Jaco ne’e responsabilidade ba ema hotu husu ba entidades sira hotu tau matan ba Illa Jaco labele so’e fo’er Arbiru.
“Ita hakarak ita nia rai henek mutin ne’ebé kapas ho Tasi ne’ebé furak iha Illa Jaco ne’e ita hotu tenke asegura nafatin nune’e futuru mai mós bele furak ba bebeik hodi bele atrai ba turista sira husi rai liur no rai laran bele mai vizita”, dehan SEF.
Iha fatin hanesan Secretário de Estado Cooperativa (SECOOP) Arsénio Pereira, da Silva hateten, Timor-Leste iha Illa ki’ik hanesan Illa Atauro ho Illa Jaco ne’ebé haleu ho Tasi oinsa nafatin Proteje no konserva nune’e oan ba beioan sira bele utiliza nafatin rikusoin Biodiversidade sira ne’ebé moris iha Tasi laran.
“Ho tema ne’ebé iha hodi komemora Loron Mundiál Oseanu ne’ebé hateten katak ha’u nia Tasi, ha’u nia Timor, ne’e atu enkoraza ita hodi hatutan luta nain sira nia mehi ba ukun rasik aan oisa kontinua luta hodi proteje ba rikusoin sira ne’ebé ita iha nune’e ba futuru oin mai ita nia oan ba beioan sira bele utilija ho diak”, dehan SECOOP
Entertantu partisipa iha atividade selebra loron Mundiál Oseanu nian, Sekretário Estadu Florestas (SEF) Sekretáriu Estadu Kooperativa (SECOOP) Prezidente Autoridade Munisipál Lautém, hamutuk ho Deputadu Albino da Silva, Prezidente Konsellu Munisipál Konbatentes Libertasaun Nasionál Munisípiu Lautém, Komandante Polísia Nasionál Timor-Leste (PNTL) Munisípiu Lautém, Ekipa Assosiasi Perjalanan Wisata Indonesia, Administrador Postu Lospalos, Iliomar, Luro, Lore, Lautém no Tutuala, Xefe Suku Mehara no Tutuala, Funsionáriu sira inklui Komunidade sira hotu.
Jornalista: Manuel Andrade
Editóra: Gaudencia Belo
