Díli (13/05/2026)– Iha loron hirak ikus ne’e, sosial média viral kona-ba instalasaun antena Starlink ne’ebe kobre sede suku 450 iha Timor-Leste. Relasiona ho ida ne’e, Ministériu Transporte no Komunikasaun, liuhusi Direção Nasional Infraestrutura Komunikasaun (DENIK), fó klarifikasaun katak antena Starlink hanesan medida temporária atu asegura konektividade internet ba sede suku sira iha Timor-Leste.
Tuir Diretór Diresaun Nasional Infraestrutura Komunikasaun (DNIK) Ambrosio Amaral hatete, prosesu atu implementa antena internet Starlink tenke liu husi etapa téknika hanesan teste, simulasaun no avaliasaun antes halo kontratu permanente. Tékniku sira halo ona trial/koko desde fulan Janeiru no fulan Fevereiru atu hare’e antena Starlink bele integra ho rede governu nian.
“Antes halo desizaun final, ami tenke halo teste no kontrola antena starlink ne’e atu garante katak servisu bele lao tuir nesesidade governu nian,” hatete DENIK ba Jornalista sira foin lalais ne’e.
DENIK esplika katak antenna Starlink la’ós substitui internet kabu fibra ótika. Governu kontinua implementa projetu kabu fibra ótika liu husi programa NCP – National Connectivity Project, ne’ebé durante tinan hirak liubá dada ona liña fibra ótika ba kapital no munisípiu sira hotu.
Atualmente, dificuldade prinsipal mak limitasaun orsamentu atu sosa ekipamentu adisional no halo koneksaun direta ba sede suku sira. Tinan ida ne’e, orsamentu DENIK tun husi serka USD 2.9 milhões ba USD 1.9 milhões, ne’ebé afeta velosidade implementasaun projetu.
DNIK mós hateten katak instalasaun antenna Starlink liu husi parseria ho kompañia Vorakai, ne’ebé providénsia ekipamentu no antenna Starlink. Governu sei selu deit servisu mensal, no antena ne’e konsidera hanesan solução temporária to’o rede fibra ótika kompleta ona.
“Wainhira infraestrutura fibra ótika kompleta ona to’o ba sub-distritu no sede suku sira, antena Starlink sei bele desliga,” klarifika DNIK.
Ministériu Transporte no Komunikasaun reafirma katak nia prioridade prinsipal mak asegura konektividade internet ba instituisaun estadu hotu iha territóriu Timor-Leste, inklui sede suku sira iha área remota.
DNIK husu ba públiku atu komprende katak utilizasaun Starlink ne’e parte husi estratéjia téknika no temporária atu garante asesu internet governu nian bele lao ho di’ak no kontroladu.
Jornalista/Estajiada : caryn / Sandra
Editor : Manuel Andrade
