(Díli), Caicoli, 05 Maiu 2026- Prezidente Repúblika, José Ramos-Horta, klarifika ba públiku kona-ba kritika ne’ebé foin mosu relasiona ho kazu mate jornalista Otílio Ote, hodi reafirma katak jornalista sira mós iha papel importante iha tempu luta ba ukun-an no konstrusaun nasaun.
Iha nia deklarasaun, Xefe Estadu subliña katak kontribuisaun jornalista sira durante luta ba ukun-an tenke hetan rekonesimentu hanesan grupu seluk sira.
“Iha tempu luta ba ukun-an, la’ós de’it veteranus, maibé jornalista sira mós fó kontribuisaun boot ba nasaun liu husi dedikasaun iha sira nia knaar,” dehan Prezidente José Ramos-Horta, iha edifísiu sentrál Komisaun Funsaun Públiku.
Nia hatutan tan katak papel média iha tempu ne’ebá importante tebes tanba ajuda lori liafuan no realidade Timor-Leste ba komunidade internasionál.
“Jornalista sira sai ponte entre povu no mundu li’ur. Sira nia servisu la’ós de’it relata notísia, maibé mós sai parte husi luta atu halo mundu rona ita nia sofrimentu no hakarak ba liberdade,” afirma nia.
Prezidente mós husu atu públiku haree kazu sira hanesan ne’e ho laran kle’an no respeitu ba ema hotu-hotu ne’ebé iha kontribuisaun ba nasaun, inklui jornalista sira ne’ebé servisu ho risku aas iha tempu difísil.
Saudozu Otélio hahú tama iha vida jornalizmu iha tinan 1988, ho obstákulu oin-oin iha momentu ne’ebá, maibé firme nafatin ho servisu jornalizmu no klandestina hodi apoiu Timor-Leste nia luta ba independénsia. Nia legadu moris iha vida komunikasaun sosiál, hela ba instituisaun média sira ne’ebé nia harii, liuliu Timor Post, sai mós mentór no Xefe Redasaun iha média oin-oin, inklui kontributór ba média internasionál.
Saudozu Otélio Ote hakotu-iis iha loron 28 fulan-abríl tinan 2026 iha RAEOA (Oé-Cusse) no Prezidente Repúblika, J. Ramos-Horta, fó Dekretu Prezidensiál ho númeru 53/2026 hodi hakoi nia iha Jardín Erói sira-nian iha Metinaro. Ne’e hanesan apresu boot ida ba mundu jornalizmu Timor-Leste nian tanba Estadu la haluha kontribuisaun husi jornalista sira-nian iha tempu luta ba independénsia Timor-Leste.
Jornalista : Caryn Camões
Editor : Francisco Pereira
