Dili, 14 Maiu 2026 – Atmosfera iha Auditóriu Faculdade Economia e Gestão (FEG) Universidade Nasional Timor Lorosa’e (UNTL) loron ida-ne’e nakonu ho estudante no juventude sira ne’ebé partisipa iha atividade “Chega! School Visit”, organizada husi Centro Nacional Chega! I.P liu husi programa Chega! Young Ambassador (Sigla-CYA) hamutuk ho Faculdade Economia e Gestão (FEG) Universidade Nacional Timor Lorosa’e (UNTL).
Atividade ne’e hala’o iha kontestu selebrasaun aniversáriu Restaurasaun Independénsia Timor-Leste ba dala-24 ho tema “Juventude Tenke Hatene no Valoriza Istória Pasadu Hodi Kontinua Luta ba Libertasaun Povú”.
Durante atividade ne’e, estudante sira hetan oportunidade atu diskute kona-ba istória luta libertasaun Timor-Leste, memória pasadu, direitus umanus no mekanizmu prevensaun konflitu hodi promove dame no estabilidade iha nasaun.
Diretór Ezikutivu Centro Nacional Chega Institutu Públiku (Sigla-CNC, I.P), Hugo Maria Fernandes, hatete katak atividade ne’e importante atu forma juventude sira atu komprende didiak istória pasadu no prepara an ba lidera nasaun iha futuru.
“Nasaun ida ne’e depende ba juventude sira. Estudante sira presija estuda maka’as atu bele jere rekursu naturál no dezenvolve Timor-Leste ho di’ak,” dehan Hugo Maria Fernandes ba jornalista sira.
Iha oportunidade ne’e, estudante Paulina da Costa husi Faculdade Turizmu mos fahe nia hanoin kona-ba importánsia Loron Restaurasaun Independénsia. Nia konsidera katak independénsia lori liberdade ba povu Timor-Leste, maibé dezenvolvimentu iha área edukasaun no saúde seidauk sufisiente.
Paulina mos husu atu governu la depende deit ba setor petrolíferu, tanba rekursu ne’e la permanente. nia sujere atu fó atensaun bo’ot ba setor turizmu hodi ajuda garante sustentabilidade ekonomia nasaun nian.
“Timor-Leste iha potensia bo’ot iha turizmu. Karik jere ho di’ak, setor ida ne’e bele ajuda ekonomia povu no nasaun,” hatete Paulina.
Iha parte seluk, Juventude rezisténsia João da Silva Chogue, ne’ebé konesidu ho naran “Joao Chogue”, husu juventude sira atu kontinua estuda no valoriza sakrifísiu luta nain sira ne’ebé fó-an ba ukun-an no liberdade Timor-Leste.
“Nós tenke lembra nafatin matebian sira no luta nain sira. Juventude agora tenke luta ho matenek no edukasaun atu dezenvolve nasaun,” dehan Joao Chogue.
Nia mos husu lider sira atu servisu ba interese povu tomak, la haree ba diferensa kor ka grupu, maibé fó prioridade ba moris povu ki’ik sira.
Jornalista/Estajiada :Carinn Camões
Editor :Ana Maria
