(Díli), 13 Maiu 2026 – Asosiasaun Jornalista Timor-Leste (AJTL) hamutuk ho Oxfam organiza treinamentu ba jornalista sira hodi hasa’e kapasidade no haburas koñesimentu kona-ba direitu feto nian ba rai no propriedade iha Timor-Leste.
Iha treinamentu ne’e, formador Tito Maia dos Reis esplika katak seguransa direitu feto nian ba rai no propriedade importante tebes ba dezenvolvimentu sosial, ekonomia no justisa iha rai-laran. la’ós deit fatin atu hela ka halo to’os, maibé mos sai fonte moris, identidade kulturál no heransa família nian.
Nia mos hateten, maski Konstituisaun RDTL garante igualdade entre feto no mane iha lei nia oin, iha realidade feto barak mak sei hasoru difikuldade atu asegura sira nia direitu ba rai. Situasaun ida ne’e akontese tanba influénsia tradisaun, falta dokumentu legál no menus informasaun kona-ba lei sira ne’ebé protege sira nia direitu.
”Ita hare ohin loron feto barak mak seidauk iha direitu ba rai, tamba ita influensia husi tradisaun kultural” hatete formador Tito Maia dos Reis ba jornalista sira,13/05/2026
Iha sorin seluk, Francisca Ximenes, jornalista husi Media One Timor, hatete katak treinamentu ida ne’e ajuda tebes atu aumenta nia koñesimentu no hasa’e nia kapasidade iha área jornalismu, liuliu kona-ba asuntu direitu feto nian.
“Materia sira ne’ebé ami aprende iha treinamentu ida ne’e importante atu ajuda ami jornalista sira bele fó informasaun ne’ebé loos no edukativu ba komunidade,” dehan Francisca.
Treinamentu ne’e espera bele kontribui atu jornalista sira bele halo kobertura ne’ebé kle’an no sensível liu kona-ba asuntu igualdade direitu no asesu feto ba rai no propriedade iha Timor-Leste.
Entretantu treinamentu ne’e partisipa husi jornalista hamutuk 27 ne’ebé mai husi media online,imprime jornal,konvensional no televisaun hanesan Media Demokrasia, TVE, Independente, SAP News TL, Media One Timor, Media Mudansa.
Jornalista : Ana Maria da Silva
Editor :Manuel Andrade
