(Díli) Bebonuk – Inisiativa negósiu ho kapitál ki’ik $20 bele transforma ona moris feto empreendedora, Ananda Janhs, ne’ebé sosa kareta ida no fó mós servisu ba ema seluk liu husi negósiu produsaun mina kami tunu.
Nia dehan, iha tempu teknolojia avansadu hanesan agora, média sosiál sai dalan importante atu promove produtu no hasa’e rendimentu família, nia hahú negósiu ida ne’e bainhira nia partu no hasoru problema fu’uk monu, halo nia la fiar an.
“Ha’u sente ohin loron mundu teknolojia ne’ebé avasadu tebes, tanba ne’e presiza utiliza média sosiál ho di’ak no bele fó benefisiu ba ita nia valór ekonómiku depois ha’u partu, labarik halo ba fulan ne’en fu’uk komesa monu, ha’u sosa mina kemiri bakar husi Indonézia nian, depois ha’u uza hela de’it maibé fu’uk nafatin monu,” dehan Ananda Janhs iha nia residensia Bebonuk, foin lalais ne’e.
Nia hatutan, dahuluk sosa mina kemiri bakar husi Indonézia, husi ne’e mosu hanoin ida katak produtu hirak ne’e bele produs rasik, depois nia koko prodús rasik liu husi sosa kami iha Merkadu Taibesi hodi tunu no sona atu produs sai mina ba fuuk. depois hetan rezultadu di’ak, nia kria pájina TikTok Kanai Kami Tunu atu promóve produtu ne’e.
“Agora tempu teknolojia avansadu tebes. Liu husi média sosial ita bele faan produtu no muda ita nia moris,” dehan Ananda
Nia haktuir, hahú produsaun ofisial iha 15 Agostu 2025, ho kapitál $20 de’it, nia sosa kami bunkus 1 bo folin 50 centavus husi negosiante sira iha Taibesi, tanba kliente barak gosta nia rejultadu di’ak, nune’e nia komesa aumenta kuantidade produsaun.
“Ha’u hahú halobprodusaun ne’e iha tinan kotuk no hahú ho fundus 20 dólar, ha’uba sosa fali kami iha merkadu Taibesse hofi mai halo produsaun, husi nd’eba ema barak mak uza sente di’ak no sira gosta entqun ha’u mós kontinua aumenta kuantidade produsaun”, konta nia
Nia salienta, agora la depende de’it ba merkadu Taibesi, maibé halo ligasaun ho fornesedór sira iha Viqueque, Manatuto Laklubar no Baucau Baguia atu garante fornesimentu kami, nia mos envolve katuas sira iha foho atu tein mina nu’u kada semana.
Nia dehan, maski seidauk iha mesin bo’ot, nia uza blender bo’ot no mesin ki’ik atu dulas kami, planu ba oin mak sosa ekipamentu modernu atu hasa’e kualidade produsaun.
Nune’e nia sente kontenti tanba seidauk to’o tinan ida nia negósiu bele fó benefísiu bo’ot ba nia an no bele fó servisu ba ema seluk.
“Faan seidauk to’o tinan ida, ha’u bele sosa kareta carry ida no motor tolu atu halo delivery, agora negósiu ne’e iha staff na’in lima, inklui ema rua ne’ebé halo delivery ba kliente sira”, hakotu nia
Inisiativa ida ne’e konsidera hanesan ezemplu di’ak ba juventude feto no mane sira atu uza kreatividade no teknolojia hodi kria oportunidade ekonómika rasik.
Jornalista: Francisco Pereira/ Madalena Delima
Editora: Sandi Belo
