(Díli),CCD,02/06/2026 – Atmosfera preparasaun ba selebrasaun Loron Nasionál TASI 2026 komesa sente ona iha kapital, bainhira Governu liu husi Vice-Primeiru-Ministru lansa konferénsia imprensa ba atividade Karavana Oseanu 2026, ne’ebé sei realiza iha loron 5 fulan Juñu tinan nee ho tema “Promove no Proteje Tasi liu husi Tara Bandu ba Futuru Sustentável.”
Tasi la’ós deit fatin ida ba peska ka turizmu, ba povu Timor-oan, tasi mak parte husi identidade, moris no kultura tanba ne’e, selebrasaun Loron Nasionál TASI tinan ida-ne’e lori mensajen forte kona-ba responsabilidade hamutuk atu rai no proteje patrimóniu naturál ida-ne’e ba jerasaun sira tuir mai.
Tuir Diretora Gabinete Fronteiras Terrestres no Marítimas, Inês de Araújo Gonçalves, tasi iha valor bo’ot liu husi rekursu naturál deit.
“Tasi mak parte importante husi identidade kulturál Timor-oan no patrimóniu ida ne’ebé tenke proteje ba jerasaun sira tuir mai, loron Nasionál TASI fó hanoin ba ita hotu kona-ba responsabilidade atu promove pratika peska no garante konservasaun ekossistema marinu sira ne’ebé sustenta moris no dezenvolvimentu nasaun,” hatete Inês de Araújo Gonçalves iha salaun CCD Dilí 2/06/2026.
Iha selebrasaun ne’e, atividade oioin hanesan limpeza tasi, kampaña sensibilizasaun ambiental, programa edukativu ba juventude no promosaun ekonomia azul sustentável sei envolve komunidade sira iha territóriu tomak, inklui Díli, Ataúro no Lautém.
Iha fatin hanesan Diretora Direisaun Nasionál Empreendimentu Atividade Turístiku, Maria Ernestina Lopes Nono, esplika preparasaun ba eventu ne’e envolve ministériu hotu-hotu no komunidade iha munisípiu 13.
“Governu liuhusi Konsellu Ministru deside ona atu selebra Loron Nasionál TASI iha dia 5 Juñu 2026. Ministério Turizmu no Ambiente hamutuk ho ministériu sira seluk no komunidade iha 13 munisípiu sei hamutuk selebra eventu ne’e, Karavana Oseanu sei hahú iha Largo Lecidere iha oras tuku 07:00 dadeer,” Reforsa Maria Ernestina Lopes Nono.
Nune’e mós Sekretáriu Estadu Komunikasaun Sosial (SEKOMS) , Expedito Loro Dias Ximenes, husu ba jerasaun foun atu sai protetór ba tasi Timor-Leste.
“Ekonomia azul mak parte importante husi ekonomia sustentável, ha’u husu ba juventude sira atu kontinua proteje tasi, tanba sira mak forsa produtiva no esperansa ba dezenvolvimentu no rikesa Timor-Leste iha futuru.”katak nia
Liuhusi Karavana Oseanu no atividade sira seluk, Governu espera katak sidadaun sira bele aumenta tan konsiénsia ambiental no hametin kultura kuidadu ba tasi, ho envolvimentu komunidade, juventude, setor privadu no parseiru internasionál sira, Loron Nasionál TASI 2026 sei sai oportunidade ida atu hatudu katak proteje tasi la’ós responsabilidade Governu deit, maibé responsabilidade hamutuk ba ema hotu.
Jornalista/ Estajida: Caryn Camões
Editor : Ana Maria da Silva
