Díli, Taibessi – Iha realidade barak husi família ne’ebé luta ba moris ho dignu, edukasaun sei enfrenta dezafiu hanesan kustu no asesu. Maske nune’e, Juvito Viana, mane ida ho idade tinan 31 husi Vemasse, katak, edukasaun nafatin sai prioridade atu muda futuru nia oan sira.
Iha merkadu Taibessi, entre movimentu komérsiu ki’ik no barullu kliente sira, Juvito faan fehuk atu sustenta moris loro-loron. Fehuk sira ne’ebé nia faan mak rezultadu husi nia servisu rasik iha Baucau, husi kuda to’o koileta, antes lori mai Díli atu faan.
“Edukasaun mak dalan atu muda futuru. Ha’u hakarak oan sira la hasoru susar hanesan ha’u,” dehan Juvito, enkuantu nia organiza nia sasan faan iha merkadu, ba jornalista Media Mudansa foin lalais ne’e.
Mane Metan ne’e kontinua akresenta rendimentu husi faan fehuk la boot, maibé nafatin sai fonte prinsipal ba nia família. Iha loron ida, nia bele hetan entre 20 to’o 30 dólares, depende ba númeru sosa na’in. Maske folin la fixu no kustu transporte mosu, nia la hakfodak atu kontinua nia servisu.
“Ha’u iha oan nain rua, agora dadaun, oan ida hahú ona eskola, no ida seluk sei hein tanba idade seidauk to’o, ha’u sente, investe iha edukasaun oan sira mak hanesan investimentu ba futuru família”. Nia hakotu
Ba Juvito, merkadu Taibessi la’ós deit fatin atu buka osan, maibé mós fatin ne’ebé nia sonha ba mudansa hahú. Kada saku fehuk ne’ebé nia faan representa esperansa ida, katak loron ida, nia oan sira bele moris di’ak liu husi nia.
Iha realidade Timor-Leste, família barak enfrenta difikuldade atu asesu edukasaun. Maibé istória Juvito Viana hatudu katak ho determinasaun no prioridade ne’ebé klaru, edukasaun bele sai xave atu loke dalan ba moris ne’ebé di’ak liu ba jerasaun tuir mai.
Jornalista : Juliana Paicheco
Editor : Francisco Pereira
