(Díli) Bebonuk – Inisiativa negósiu ho kapitál ki’ik ho osan dolares amerikanu rua nulu ($20) bele transforma ona moris feto emprendedora Timoroan Ananda Janhs, ne’ebé agora dadaun konsege sosa kareta (Gran Max) ida no motor tolu (3) husi negósiu produsaun Mina Kami Tunu ne’ebé nia fa’an no promóve liuhusi média sosial Tik-Tok.
Tuir Ananda hatete, iha tempu teknolojia avansadu média sosial sai matadalan importante atu promove produtu no husi ne’e bele hasa’e rendimentu família, negósiu ne’ebe emprendedora ne’e halo tamba hetan motivasaun husi nia problema rasik hanesan Fu’uk monu.
“Ha’u sente ohin loron mundu teknolojia ne’ebe avasadu tebes, tamba ne’e presiza utiliza media sosial ho diak no bele fo benefisiu ba ita nia valor ekonomiku depois ha’u partus labarik halo ba fulan neen fuuk komesa monu, ha’u sosa mina kemiri bakar husi Indonézia nian, depois ha’u uza hela deit maibe fuk nafatin monu,” dehan Ananda Janhs iha nia residensia Bebonuk, foin lalais ne’e.
Nia hatutan dahuluk sosa mina kemiri bakar husi Indonézia, husi ne’e mosu hanoin ida katak produtu hirak ne’e nia bele produs rasik iha uma, hafoin koko prodús rasik liuhusi sosa kami iha Merkadu Taibesi hodi tunu no sona hodi sai ba mina fuuk ne’ebe bele resolve problema fu’uk monu. hafoin hetan rezultadu di’ak, nia kria pájina TikTok ho naran Kanai Kami Tunu atu promóve produtu ne’e. Liuhusi média sosial ita bele faan produtu no muda ita nia moris.
Nia hahú produsaun ofisial iha loron 15 fulan Agostu tinan 2025, ho osan dolares amerikanu rua nulu ($20 ). Dahuluk nia sosa kami plastiku ida (bunkus) ho nia presu centavos lima nulu ($ 0.50) husi negosiante sira iha Taibesi. Ho resultadu ne’ebe sae no aumenta komsumidor ba nia produtu nia koko hasa’e tan produsaun ne’e ho kuantidade bo’ot.
`
Nia salienta produtu kami ne’ebe nia sosa la depende de’it ba iha merkadu Taibesi, maibé nia mos halo ligasaun ho fornesedór sira husi munisipiu Viqueque, Manatuto posto Laklubar no Baucau posto Baguia atu garante fornesimentu kami ne’ebe ho nia kuantidade barak inklui nia mos envolve ho katuas sira iha foho atu tein mina nu’u kada semana hodi fa’an iha kapital Díli.
Maske seidauk iha ekipamentu avansadu ba produsaun boot, nia uza deit ekipamentu sira iha dapur hanesan blender bo’ot no mesin dulas kami, no nia iha planu ba oin aumenta tan ekipamentu modernu atu hasa’e kapasidade produsaun.
Nia deklara, onradu tebes wainhira seidauk to’o tinan ida nia negósiu bele fó benefísiu boot ba nia a’an no bele fo servisu ba ema seluk.
“Fa’an seidauk to’o tinan ida, ha’u bele sosa kareta gran max (ida) no motor (tolu) atu halo delivery, Agora negósiu ne’e iha staff na’in lima, inklui ema rua ne’ebé halo delivery ba klienti sira,” nia dehan.
Inisiativa ida ne’e konsidera hanesan ezemplu di’ak ba juventude no empreza feto sira atu uza kreatividade no teknolojia hodi kria oportunidade ekonómika rasik.
jornalista : Francisco Pereira/ Madalena Delima
