(Díli),CCD,02/06/ 2026– Vise-Primeiru-Ministru no Ministru Koordenadór ba Asuntu Ekonómiku, no Ministru Turizmu no Ambiente, Francisco Kalbuady Lay, husu komunidade atu atensaun no kuidadu ba ambiente liu-liu iha área tasi ninin hodi prevene soe lixu arbiru, tanba lixu ne’ebé la kuidadu mak bele fó impaktu ba vida animal marinu sira iha tasi laran.
Nia reforsa,problema sira ne’ebé iha tasi la mai husi tasi rasik, maibé maioria husi atividade ema nian iha rai maran, inklui soe lixu la tuir fatin
”Ita tenki kuidadu ita nia ambiente iha tasi ninin hodi nune’e la bele fó impaktu ba ita nia animal sira iha tasi, hanesan ikan ai-parapa, tanba lixu sira ne’ebé ita la tau tuir nia fatin sei ba akumula hamutuk iha tasi,” hatete Francisco Kalbuady Lay iha CCD, 02/06/2026
Nia esplika katak,Ministériu Turizmu no Ambiente kontinua implementa politika no planeamentu azul (Blue Planning) hodi hametin konservasaun ekosistema marinu no asegura sustentabilidade rekursu tasi nian.
”Ne’e mak definisaun ne’ebé ita halo iha politika no planeamentu azul ba Ministériu Turizmu no Ambiente atu bele kordena ho ministériu relevante sira hodi mantein no asegura kontrolu ba área protejida sira ne’ebé estabelese ona, hanesan área marina iha Atauro,”dehan nia.
Tuir nia, esforsu protesaun ambiente la’os deit ho governu nia responsabel, maibé presiza mós partisipasaun ativa husi komunidade atu hamutuk mantein limpeza no saúde ambiente ba jerasaun foun sira iha futuru.
Nia mós reafirma katak, konsiénsia públika kona-ba jestaun lixu no kuidadu ba ekosistema tasi importante tebes atu reduz impaktu negativu ba biodiversidade mariña, no garante sustentabilidade rekursu naturál Timor-Leste nian.
Jornalista: Ana Maria da Silva
Editor :Manuel Andrade
