Díli, 14 Maiu 2026 – Eviksaun ne’ebé akontese iha área Aimutin, Díli, provoka insatisfasaun no lamentasaun husi komunidade afetada sira ne’ebé konsidera medida ne’e la justu no uza forsa fiziku bainhira hasai komunidade sira husi sira nia hela fatin.
Operasaun eviksaun ne’e envolve membru Polisia Nasional Timor-Leste (PNTL) no autoridade relevante sira atu organiza área refere. Maibé, durante prosesu, situasaun sai tensa makas tanba komunidade balun kontra maneira ne’ebé autoridade sira hala’o iha operasaun ne’e rasik.
Komunidade afetadu Josefina Pinto, hateten katak nia la satisfaz ho maneira eviksaun ne’ebe halo husi Autoriedade relevante sira. Ho lian forte no sentimentu triste, nia husu autoridade sira atu respeita komunidade nu’udar ema humanu.
“Ami la’os animal hodi ita bo’ot sira mai ho forsa fiziku hodi hamtauk no hasoru ami ho farda no kareta ne’ebé uza osan povu nian. Tanba ne’e fó mós valór ba ami hanesan povu nasaun ida ne’e nian,”hateten Josefina Pinto iha Aimutin, 14/05/2026.
Nia mos akuza katak despezu administrativu ne’e la lao tuir prosedimentu no oras apropriadu, no uza forsa fiziku hodi hafuhu no duni sai komunidade sira husi uma/hela fatin.
Sorin seluk, Leticia ho idade 10, hato’o nia tristeza bainhira haree nia uma hetan demolisaun. Nia dehan situasaun ne’e afeta nia família no nia edukasaun.
“Haree ema sobu ami nia uma ami tanis ho laran taridu tanba ami lakon horik fatin. Ami mos sei la ba eskola tanba ami nia uma laiha ona. Ha’u sei ki’ik oan, haree ema dudu hau nia mama no baku hau nia maun to’o hetan kanek iha liman,”haktuir Leticia ho matan ben.
Enkuantu eviksaun ne’e rasik komunidade konsidera ilegal tamba maioria komunidade/uma-kain nebe’e hela Iha fatin refere hahu husi Tempu uluk kedas.
Enkuantu Komandu Operasaun RIR PNTL, MatiasMatias da Silva dehan, operasaun ne’e hala’o tuir ordem husi Estado no parte seguransa sira kumpri de’it instrusaun ne’ebé komando jeral fó.
“Ami hanesan parte seguransa nasaun nian, tanba ne’e ami lao tuir de’it ordem ne’ebé mai husi Estado. Ita hotu presija koopera malu atu hadia ita nia cidade ida ne’e,”Nia akresenta
Nia hatutan katak dezentendimentu entre komunidade no parte seguransa mosu tanba iha komunidade balu la hakarak kumpri ordem ne’ebé fó sai maibe situasaun hotu lao hakmatek
“Parte balun mosu forsa/kekerasan tanba iha komunidade balu ulun to’os la kumpri ba ordem sira, ne’e mak halo dezentendimentu entre komunidade no parte seguransa,”nia subliña
Entretantu tuir observasaun to’o oras ne’e dadaun, situasaun iha área Aimutin sei kontroladu husi autoridade sira, no komunidade afetada balun hein hela solusaun no apoiu husi Governu kona-ba fatin foun nebe sira atu ba hela.
Jornalista /Estajiada :Cipriana Da silva
Editor :Ana Maria
