(Díli), Lecidere 22 Abril 2026– Atividade ne’e organiza husi Ministério da Juventude, Desporto, Arte e Cultura (Sigla-MJDAC), ho kolaborasaun husi Alumni Parlamentu Foinsa’e Timor Leste (Sigla-APFTL), nu’udar parte husi programa parlamentu foinsa’e iha períodu ida ne’e, halibur membru sira husi postu no munisípiu oin-oin konsentra iha Díli atu prepara atividade estudu vizita, hanesan programa regulár ne’ebé realiza iha kada períodu.
Tuir Ministério da Juventude, Desporto, Arte e Cultura akresenta katak, atmosfera iha Díli ohin loron hatudu movimentu ida ne’ebé diferente, bainhira joven sira husi postu no munisípiu oioin halibur malu atu prepara viajen importante ida. Atividade ne’e organiza husi Ministério da Juventude, Desporto, Arte e Cultura, ho kolaborasaun husi APFTL, nu’udar parte husi programa parlamentu foinsa’e iha períodu ida ne’e.
“Iha tinan ida ne’ebé remata mai, joven sira ne’e sei la’ós de’it rona relatóriu iha sala reuniaun, maibé sira deside atu tun diretamente ba kampu, liuhusi vizita ba área fronteira hanesan Covalima, RAEOA Oe-Cusse Ambeno no Bobonaro”, dehan Diretor DNAJ, MJDAC Mario Tilman , iha salaun MJDAC, 22/04/2026.
Iha sorin seluk Prezidente APFTL Benvinda Gusmão Alves akresenta katak, estudu vizita ne’e la’ós de’it hanesan viajen komum. Iha ne’ebá, membru sira sei halo observasaun direta ba moris loron-loron komunidade fronteira, ko’alia ho joven sira, no rona sira nia esperiénsia kona-ba edukasaun, saúde, no oportunidade servisu.
Iha tempu hanesan, sira mós sei vizita instituisaun importante hanesan servisu imigrasaun, Unidade Patrulhamentu Fronteira no postu saúde atu komprende servisu no dezafiu sira iha nivel lokal.
“Programa ne’e mos fó oportunidade ba joven sira atu hare realidade ho matan rasik. Iha fronteira, problema hanesan disputa rai, mobilidade entre nasaun rua no kazu tama-sai ilegál sai parte husi realidade loron-loron ne’ebé sira hakarak komprende liután”, dehan Prezidente APFTL
Iha okiaziaun ne’e mós reprezentante membru parlamentu foin sae husi munisípiu Bobonaro, Ercomvaldo Gama Vicente hatutan tan katak, Durante loron lima atividade ne’e hala’o, membru sira sei halibur dadus husi entrevista no observasaun.
“Ikus mai, iha fulan Jullu, ami sei halibur fali iha Díli atu halo plenária, diskute rezultadu no prepara rekomendasaun ba governu, liuliu iha área lima importante kona-ba juventude: edukasaun, saúde, empregu, partisipasaun sivika, no prevene violénsia”. Ercomvaldo hakotu.
Liu husi atividade ne’e, parlamentu foinsa’e la’ós de’it aprende kona-ba realidade iha fronteira, maibé mos sai ponti ida ne’ebé liga lian komunidade ho polítika públiku, atu garante katak voz juventude kontinua rona iha nivel nasionál.
Jornalista : Milenio D.C. Maria
Editor : Francisco Pereira
