(Díli), Taibesi 28 Abril 2026– Freduarti Nunes, joven ida ne’ebé luta ba moris hodi sustenta nia família sira liu husi negósiu kiik, nia hili atu husik hela moris iha foho no hahú hala’o negósiu iha Díli, tanba limitasaun rendimentu iha área rurál ne’ebé depende deit ba to’os no natar.
Iha Merkadu Taibesi, Freduarti Nunes sai hanesan ezemplu ida ba joven sira ne’ebé hakarak hamriik rasik liuhosi negósiu ki’ik. Maske foin hahú nia atividade durante fulan ida, nia hatudu ona persisténsia no vontade forte atu sustenta nia moris no ajuda família.
“Ha’u fa’an tomate loro-loron ho kapitál limitadu, no rezultadu negósiu la fixu, tanba depende ba kliente sira ne’ebé mai sosa. Dalaruma ha’u bele hetan $4 to’o $10, maibé iha tempu seluk ha’u hetan menus liu, to’o deit $1 no bainhira sasan la sosa loron tomak, no ha’u hahú negósiu ne’e ho osan $ 30 dolar amerikanu, Maibé ha’u nafatin agradese tanba ida ne’e parte husi prosesu,” nia dehan ho laran triste bainhira nia aruma hela nia sasan, iha Merkadu Taibesi foin lalais ne’e.
Freduarti Nunes, esplika katak kompetisaun iha merkadu aas tebes, tanba la’ós nia mesak mak fa’an, maibé iha negosiante barak ne’ebé fa’an produtu hanesan. Ida ne’e halo rendimentu ladún diak.
Aleinde difikuldade ekonomia, Freduarti mós enfrenta dezafiu seguransa. Tuir nia, merkadu relativu seguru durante loron, maibé iha tempu kalan, kondisaun ladún seguru tanba dalaruma akontese problema.
“Osan ne’ebé ha’u hetan, ha’u uza atu sustenta nesesidade loro-loron, ajuda alin sira ba eskola, no mós haruka ba inan-aman iha foho. Ha’u konsidera maske rendimentu ki’ik, maibé iha valor boot tanba bele ajuda família”. Nia hakotu
Freduarti mós enfatiza importánsia relasaun di’ak ho kliente. Nia fiar katak servisu di’ak no komunikasaun di’ak bele lori kliente fila fali.
Iha parte ikus, nia hato’o mensajen ba joven sira atu la depende deit ba inan-aman, maibé tenke esforsu rasik hodi hetan moris di’ak no prepara futuru.
Ho determinasaun no persisténsia, Freduarti Nunes prova katak negosiu ki’ik bele sai dalan ida atu hadia moris no sustenta ekonomia família.
Jornalista/ Estajiaria : Sandra Daniela da Purificação Ramos
Editor : Francisco Pereira
